«Нашай ніве» сталі вядомыя дэталі крымінальнай справы супраць 60-гадовай менскай пэнсіянэркі Натальлі Ладуцькі, асуджанай на 4 гады пазбаўленьня волі за дапамогу палітвязьням.
Натальлю Ладуцьку затрымалі 23 студзеня 2024 году ў рамках рэйду сілавікоў за дапамогу палітвязьням. Адрозна ад многіх іншых затрыманых у тыя дні беларусак, яе пакінулі пад вартай і пасьля абвінавацілі паводле ч. 1 і 2 артыкула 361-4 Крымінальнага кодэксу («Садзейнічаньне экстрэмісцкай дзейнасьці»). 11 лютага 2025 году судзьдзя Яўген Пісарэвіч прызнаў Натальлю вінаватай і прысудзіў ёй 4 гады пазбаўленьня волі і штраф у 25 200 рублёў.
«Наша ніва» даведалася, што канкрэтна судзьдзя Пісарэвіч палічыў злачынствам. Фармулёўка суду гучыць так: «бязвыплатныя пералічэньні грашовых сродкаў і адпраўленьняў прадуктаў харчаваньня, прадметаў адзеньня, сродкаў асабістай гігіены і іншых прадметаў асобам, якія ўтрымліваюцца пад вартай і ў месцах выкананьня пакараньня, зьвязанага з пазбаўленьнем волі». «Экстрэмісцкае фармаваньне», у садзейнічаньні якому абвінавацілі Натальлю, гэта Dissidentby.
У справе Натальлі Ладуцькі пералічана 177 эпізодаў — гаворка ідзе пра грашовыя пераводы і пасылкі. Некалькі прыкладаў таго, што ставілі ёй у віну: пералічыла 100 рублёў на турэмны рахунак вязьня, адправіла пасылку вагой 4 кіляграмы.
Згодна з матэрыяламі справы, Натальля Ладуцька рабіла грашовыя пераводы і слала пасылкі вязьням крыху больш за два гады: першае адпраўленьне адбылося ўлетку 2021 году, апошняе — у сьнежні 2023 году, за месяц да затрыманьня жанчыны. За гэты час, згодна з матэрыяламі справы, яна пералічыла больш як 4000 рублёў і адправіла пасылак вагой больш як на 500 кіляграмаў.
Пракурор Дзьмітры Хаваўка прасіў пакараць Натальлю Ладуцьку 4 гадамі калёніі і штрафам памерам у 500 базавых велічынь (21 тысяча беларускіх рублёў). Судзьдзя вырашыў павялічыць памер штрафу да 600 базавых (25,2 тысячы рублёў).
Цяпер Натальля Ладуцька знаходзіцца ў Гомельскім СІЗА і чакае апэляцыі ў сваёй справе.
- У канцы студзеня 2024 году ў Беларусі прайшла масавая хваля перасьледу сем’яў палітвязьняў за атрыманьне імі прадуктовых перадач праз ініцыятыву IneedHelpBY, якую ўлады прызналі «экстрэмісцкім фармаваньнем». Ператрусы, допыты і затрыманьні закранулі сама меней 287 чалавек. У пастановах на ператрусы пазначаныя крымінальныя артыкулы за «фінансаваньне экстрэмісцкай дзейнасьці» (арт. 361-2 КК) і «спрыяньне экстрэмісцкай дзейнасьці» (арт. 361-4 КК). Таксама пад перасьлед за салідарнасьць трапілі тыя, хто слаў палітвязьням невялікія грашовыя пераказы або лісты падтрымкі.
- Пасьля гэтага на некаторых затрыманых завялі крымінальныя справы за тое, што падтрымлівалі палітвязьняў невялікімі грашовымі пераказамі і перадачамі. На канец 2024 году праваабаронцам было вядома, што ў справе салідарнасьці з палітвязьнямі асудзілі прынамсі 37 чалавек, сярод якіх адзін мужчына, астатнія — жанчыны, пераважна ўзростам болей за 50 гадоў. На іх завялі крымінальныя справы за «спрыяньне экстрэмісцкай дзейнасьці» паводле ч. 1 і ч. 2 арт. 361-4 Крымінальнага кодэксу. У гэтым артыкуле затрыманым пагражае да 7 гадоў калёніі.
- Нягледзячы на тое, што затрыманыя дапамагалі палітвязьням з уласнага жаданьня і з уласных грашовых сродкаў, іх абвінавачваюць у «спрыяньні экстрэмісцкай дзейнасьці». Істота абвінавачваньня ў тым, што яны нібыта бралі інфармацыю аб палітвязьнях на рэсурсах, прызнаных у Беларусі «экстрэмісцкімі фармаваньнямі». Ідзецца пра інтэрнэт-рэсурсы праваабарончых арганізацый і ініцыятываў, якія публікавалі заклікі падтрымліваць палітвязьняў.
Форум