Пра тое, што наземная апэрацыя можа пачацца хуткім часам, улады Ізраілю папярэдзілі Вашынгтон, паведамляюць тэлеканал CBS і газэта The Washington Post са спасылкай на крыніцы ў адміністрацыі ЗША.
Заплянаваная Ізраілем наземная апэрацыя будзе менш маштабнай, чым у 2006 годзе, і засяродзіцца на зьнішчэньні інфраструктуры баевікоў уздоўж мяжы, піша The Washington Post са спасылкай на амэрыканскіх чыноўнікаў. Паводле інфармацыі газэты, у панядзелак 30 верасьня ізраільскія войскі правялі абмежаваныя рэйды ў Лібан.
Між тым, міністар абароны Ізраілю Ёаў Галант заявіў, што «наступная фаза вайны супраць „Хэзбалы“ пачнецца ў бліжэйшы час».
Сталая прадстаўніца ЗША пры ААН Лінда Томас-Грынфілд заявіла, што Вашынгтон жадае дамагчыся дээскаляцыі і ня хоча, каб гвалт распаўсюджваўся на Блізкім Усходзе. Паводле яе, ЗША і Ізраіль знаходзяцца ў шчыльным кантакце.
Раней прэзыдэнт ЗША Джо Байдэн на пытаньне журналістаў аб тым, ці непазьбежная наземная апэрацыя Ізраілю ў Лібане, заявіў: «Настаў час спыніць агонь».
Форум