Заснавальнік фонду салідарнасьці BY_help Аляксей Лявончык склаў заявы аб зьнікненьні Анжалікі Мельнікавай ў Metropolitan Police ды NCA — нацыянальную крымінальную агенцыю Вялікай Брытаніі.
«Я, канешне, не сваяк, але мне аднойчы былі блякавалі рахунак на піку BY_help ў 2020 годзе, калі на ім ляжалі вынікі той шалёнай зборкі. Тады хапіла аднаго званка ў службу падтрымкі Barclays з просьбай пачытаць прэсу. Разблякавалі праз пару гадзін. Тут добра рэагуюць на публічнасьць», — адзначыў Лявончык у сваім допісе на фэйсбуку.
Далей Лявончык плянуе гаварыць з памежнай службай у аэрапортах Лутан і Хітроу. Гэта адзіныя два аэрапорты, куды Анжаліка магла прыляцець з аэрапорту Шапэна ў Варшаве.
«Я вырашыў вызначыць, ці Анжаліка сапраўды прызямлялася ў Вялікай Брытаніі. Бо мне падаецца вельмі дзіўным, што чалавек, які вылецеў з Польшчы ў іншую краіну, падарожжы паміж якімі дастаткова добра адсочваюцца, проста зьнік. Паглядзім, што з гэтага выйдзе», — сказаў Лявончык «Белсату».
Ён адзначае, што ўзяўся за справу, бо ў Польшчы ў джяржаўных структурах пра Анжаліку Мельнікаву спрабуюць даведацца і журналісты, і паплечнікі, а ў Вялікай Брытаніі дыяспара беларусаў невялікая.
«У мяне ёсьць грамадзянства і Вялікай Брытаніі, і Польшчы, то бок я звяртаўся ў паліцыю як доўгатэрміновы рэзыдэнт Вялікай Брытаніі. Мне падаецца, што тут асноўны акцэнт павінен рабіцца на справе аб зьнікненьні чалавека. Магчыма, яны скажуць, што гэтая інфармацыя зьяўляецца таямніцай сьледзтва, калі гэтае сьледзтва ёсьць. Магчыма, яны змогуць даць нам нейкую інфармацыю», — працягвае Лявончык.
Пры гэтым дапамагчы ў справе можа грамадзкі розгалас, упэўнены грамадзкі дзеяч.
«Натуральна, калі гэта прыватная справа, то яе датычаць усе захады абароны інфармацыі. Натуральна, што ні польская пракуратура, ні паліцыя ня могуць дзяліцца інфармацый па-за межамі сваіх кампэтэнцыяў — таямніца сьледзтва. Яны могуць падзяліцца толькі са сваякамі. Але, мне падаецца, што тут справа грамадзкага інтарэсу. Анжаліка не зьяўляецца прыватнай асобай, гэта постаць беларускай апазыцыі, якая, мяркуючы па публікацыях, мела сувязь і з Кібэрпартызанамі, і з іншымі асобамі, што дае мне магчымасьць думаць, што, калі такі чалавек зьнік, то ня проста так», — падкрэсьлівае Лявончык.
Ён дадае, што для яго гісторыя выглядае падобнай да зьнікненьня палітыкаў у Беларусі ў 90-я і 2000-я.
У СМІ зьявілася інфармацыя, што Мельнікава самастойна вылецела з Польшчы, як заяўлялася, у Вялікую Брытанію, «пасьля чаго яе след згубіўся». СМІ таксама адзначылі, што невядома, дзе яе дочкі (6 і 12 гадоў).
Мельнікава была абраная старшынёю Каардынацыйнай рады трэцяга скліканьня 11 ліпеня 2024 году ад блёку «Каманда Латушкі і Рух „За Свабоду“», які значна апярэдзіў астатнія кааліцыі колькасьцю атрыманых галасоў і ў выніку заняў 28 з 80 месцаў у КР.
Раней зьявілася інфармацыя, што Мельнікава, хутчэй за ўсё, знаходзіцца не на тэрыторыі ЭЗ. Паводле зьвестак сакратарыяту Каардынацыйнай рады, яе былы муж можа цяпер быць у Беларусі. Дэлегаты КР ня бачылі Мельнікаву ўжо некалькі тыдняў, бо яна спаслалася на тое, што хварэе на COVID-19. Але яна заставалася на сувязі прынамсі да 21 сакавіка. Дочкі Мельнікавай таксама зьніклі.
Хто такая Анжаліка Мельнікава
Прадстаўніцу сьпісу «Каманда Латушкі і рух „За свабоду“» Анжаліку Мельнікаву абралі сьпікеркай Каардынацыйнай рады ў ліпені 2024 году.
Мельнікава скончыла Менскі дзяржаўны лінгвістычны ўнівэрсытэт і Беларускі дзяржаўны эканамічны ўнівэрсытэт. Да 2018 году была намесьніцай генэральнага дырэктара «Кока-Кола Беўрыджыз Беларусія», пасьля пайшла ў дэкрэтны адпачынак. У 2020-м яе двойчы затрымлівалі на пратэстах, сям’я выехала зь Беларусі.
З чэрвеня 2022 году яна была каардынатаркай праектаў «Народнага антыкрызіснага ўпраўленьня» на чале з Паўлам Латушкам.
Выступаючы на паседжаньні Каардынацыйнай рады 10 ліпеня 2024 году, яна назвала асноўнымі кірункамі сваёй дзейнасьці ў выпадку выбраньня «працу ў інтарэсах беларусаў і вырашэньне канкрэтных праблем людзей», пашырэньне паўнамоцтваў КР і яе ўзаемадзеяньня з АПК, узьняцьце ўзроўню і прэстыжу КР, структурызацыю і якаснае асьвятленьне яе працы.
Форум