Ініцыятарка праекту #Framed in Belarus Руфіна Базлова расказала Reform.news, што кожны раз, як ладзіцца выстава праекту #Framed in Belarus, арганізатары працуюць з прасторай канцэптуальна: «Кожны раз праект прэзэнтуецца па-новаму. Гэтым разам у нас было падвальнае памяшканьне, а наш праект — пра палітзьняволеных, пра схаванае ад вачэй. Рэжым, з аднаго боку, спрабуе зьняволеных схаваць, а зь іншага, як у андэграўндзе, усё роўна адбываецца нейкі рух».
Арганізатары выкарысталі чатыры пакоі, каб правесьці гледача праз усю гісторыю праекту і падзей у Беларусі за апошнія гады. Пачынаецца ўсё з 2020-га, з пратэстаў. Руфіна Базлова тады рабіла серыю вышыванак на тэму беларускіх пратэстаў — «Гісторыю беларускай выжыванкі».
У другім пакоі выстаўленыя вышыўкі з гісторыямі палітзьняволеных і разьмешчаныя спэцыяльныя папкі з апісаньнямі гэтых гісторый. То бок кожны глядач можа пагрузіцца ва ўласнае дасьледаваньне. І там жа можна напісаць ліст да зьняволеных.
У трэцім пакоі разьмешчаны плян турэмнай камэры, там выстаўлена толькі адна вышыўка — з гісторыяй нябожчыка Вітольда Ашурка.
І апошні пакой — пра салідарнасьць, ён сплянаваны так, каб даць наведніку надзею. Там прадстаўленыя камэнтары саміх удзельнікаў праекту. Там жа можна даведацца пра праект і далучыцца да яго.
«Пасьля глядач вяртаецца назад, і мне самой цікава, што ён адчувае, калі ён ідзе зваротным шляхам», — расказала Руфіна Базлова.
- Праект #Framed in Belarus — сацыяльны арт-праект, прысьвечаны палітзняволеным, ён ініцыяваны мастачкай Руфінай Базловай (Беларусь) і куратаркай Сафіяй Токар (Малдова). Яго мэта — стварыць партрэты ўсіх незаконна асуджаных людзей з выкарыстаньнем традыцыйнай тэхнікі вышыўкі — крыжыкам, чырвонай ніткай на белым фоне. Такім чынам беларускі арнамэнт становіцца кодам для запісу сучаснай гісторыі краіны.
Форум