«Увесь участак польска-беларускай мяжы ў Падляскім ваяводзтве ўжо знаходзіцца пад сучасным маніторынгам», — адзначыла ведамства.
5 лютага прэс-сакратар Памежнай аховы Польшчы Анджэй Юзьвяк паведаміў пра завяршэньне мантажу электроннай загароды на гэтым участку мяжы. Паводле яго, на рэках Істачанка і Сьвіслач устанавілі больш за 500 слупоў і 1,3 тысяч камэраў назіраньня, таксама пабудавалі ўсе падсыстэмы, сілавыя злучэньні і валаконна-аптычныя лініі перадач.
Пабудаваць электронную загароду вырашылі ў сувязі са шматлікімі спробамі перасячэньня польска-беларускай мяжы праз памежныя рэкі. Кантракт на будаўніцтва электроннай загароды быў падпісаны ў канцы лютага 2024 году. У праект уклалі 85 мільёнаў злотых (каля 19,55 млн эўра). Даўжыня бар’ера складае каля 47 кілямэтраў.
У 2022 годзе на мяжы зь Беларусьсю паставілі сталёвы бар’ер даўжынёй 186 км і вышынёй 5,5 мэтра — гэта асноўны элемэнт абароны польска-беларускай мяжы ад нелегальнай міграцыі. Яго дапаўняе электронны барʼер даўжынёй 206 км у Падляскім ваяводзтве, але ён не ахопліваў рачных участкаў. Цяпер у Польшчы таксама праводзяць мадэрнізацыю гэтага раней пабудаванага барʼера, яе плянуюць завяршыць да канца лютага 2025 году. У рамках мадэрнізацыі паставяць дадатковыя камэры назіраньня за тэрыторыяй, што за мэталічным плотам, сьвятладыёдныя ліхтары для асьвятленьня дарогі і дадатковыя камэры для мацаваньня водапрапускных трубаў.
- З пачатку 2025 году, паводле падлікаў «Позірку», Польшча спыніла сама меней 4,1 тысячы спробаў незаконнага перасячэньня мяжы зь беларускай тэрыторыі. Дэталёвы аналіз ускладнены ў сувязі тым, што Памежная ахова ў апошнія месяцы публікуе прыблізныя лічбы, якія разыходзяцца са зьвесткамі іншых краін Эўразьвязу, якія суседнічаюць зь Беларусьсю. Служба аховы дзяржаўнай мяжы Літвы спыніла 221 такую спробу, Дзяржаўная памежная ахова Латвіі — 476.
- За 2024 год Літва, Латвія і Польшча агулам спынілі 36,3 тысячы спробаў незаконнага пранікненьня мігрантаў зь беларускай тэрыторыі.
- У чэрвені 2024 году на польска-беларускай мяжы ў сувязі з узмацненьнем міграцыйнага ціску стварылі так званую буфэрную зону. Яна пачала дзейнічаць з 13 чэрвеня і была створаная на 90 дзён, пасьля тэрмін яе дзеяньня неаднойчы падаўжалі. Даўжыня буфэрнай зоны — 60,67 км, шырыня — ад 200 м да 2 км. На працягу 44 км буфэрная зона ахоплівае 200 м ад лініі дзяржаўнай мяжы. Заезд у буфэрную зону забаронены. Абмежаваньні на перамяшчэньне і знаходжаньне ўнутры буфэрнай зоны ўведзеныя ў 27 населеных пунктах Гайнаўскага і Беластоцкага паветаў Падляскага ваяводзтва, якое мяжуе зь Беларусьсю.
- З 1 жніўня 2024 году польская армія таксама праводзіць апэрацыю «Бясьпечнае Падляшша», у межах якой для садзейнічаньня памежнікам, якія ахоўваюць мяжу зь Беларусьсю, накіравалі некалькі тысяч вайскоўцаў.
- Міграцыйны крызіс на мяжы Беларусі і краін ЭЗ працягваецца зь вясны 2021 году. Улады суседніх эўрапейскіх дзяржаў лічаць яго «гібрыднай атакай», арганізаванай рэжымамі ў Менску і Маскве. 3 кастрычніка 2024 году міністар унутраных спраў і адміністрацыі Польшчы Томаш Семоняк прызнаўся, што сытуацыя на мяжы зь Беларусьсю стала «адным з самых сур’ёзных крызісаў» для польскай дзяржавы і «велізарным выклікам» для яго самога.
Форум