Фёдар Віктаравіч Гарбачоў, сужэнец журналісткі Вольгі Сямашкі, мае яшчэ адзін пашпарт на імя Віктар Фёдаравіч Макавееў. Зьвесткі пра гэтым выданьню Reform.news перадалі актывісты супольнасьці ананімных хакераў «Кібэрпартызаны».
Згодна зь перададзенай інфармацыяй з узламанай беларускай АІС «Пашпарт», два пашпарты на розныя імёны — Фёдара Віктаравіча Гарбачова (нарадзіўся 1979-07-30) і Віктара Фёдаравіча Макавеева (1978-07-29) — выдадзеныя аднаму чалавеку, мяркуючы па фота, зробленым для дакумэнту.
Вольга Сямашка пасьля публікацыі эксклюзіўнага расьсьледаваньня выданьня «Наша ніва» зьняпраўдзіла інфармацыю аб тым, што яе сужэнец мае так званы «пашпарт прыкрыцьця». Паводле яе, ні ёй, ні яе сужэнцу «ні пра якія пашпарты прыкрыцьця нічога невядома».
Сям’я выехала зь Беларусі 7 верасьня 2020 году. Да гэтага моманту Вольга Сямашка амаль 20 гадоў працавала на Беларускім радыё, большую частку зь іх — у прэм’ерскім пуле Службы інфармацыі на Першым канале, а яе муж Віктар Гарбачоў — кансультантам кампаніі Wargaming у ваеннай гісторыі .
У супольнасьці «Кібэрпартызаны» паведамілі, што «пашпарт прыкрыцьця яму выдалі ў лютым 2018 году». «Гэта мы таксама пацьвярджаем», — працытавала выданьне актывістаў-хакераў.
У публікацыі патлумачылі, што ў Беларусі другі пашпарт аднаму чалавеку выдаюць у выключных выпадках, напрыклад, супрацоўнікам спэцслужбаў для правядзеньня спэцыяльных апэрацыяў. Таксама пашпарт са зьмененай інфармацыяй могуць атрымаць набліжаныя да сям’і Аляксандра Лукашэнкі для абыходу санкцыяў або сакрэтнага перамяшчэньня за мяжой.
Форум