Распрацоўнік праграмнага забесьпячэньня EPAM прадаў расейскую юрыдычную асобу ТАА «ЭПАМ Системз» расейскай групе «Рексофт», што вынікае з рэестравых зьвестак ЕГРЮЛ, на якія спасылаецца Interfax.
«Рексофт» паведаміў, што група набыла 100% кампаніі RNT Group, якая ёсьць праваўладальнікам ТАА «ЭПАМ Системз» — «дачкі» EPAM Systems Inc. у Расеі.
Паводле ўмоваў пагадненьняў з EPAM Systems Inc. кампанія ня можа выкарыстоўваць брэнд EPAM у Расеі.
У паведамленьні таксама ўдакладняюць, што ўмовы ўгоды не даюць магчымасьці зваротнага выкупу. Плянуецца, што на асноўныя захады аб’яднаньня пойдзе каля году, а агульны штат супрацоўнікаў перавысіць 1,5 тысячы чалавек. Сума ўгоды не называецца.
Кампанія EPAM Systems Inc., распрацоўнік праграмнага забесьпячэньня на замову, заснаваная ў 1993 годзе. У красавіку 2022 году яна паведаміла аб намеры спыніць працу ў Расеі на фоне падзеяў ва Ўкраіне. У верасьні кампанія паведаміла, што падпісала пагадненьне аб продажы практычна ўсіх сваіх расейскіх актываў, але ўгода так і не адбылася: тэрмін падпісанай дамовы скончыўся, кампанія пераглядае яе варункі, паведамляла EPAM у лютым 2023 году.
У траўні кампанія паведаміла, што атрымала дазвол расейскіх уладаў на ўгоду.
