Праект кампаніі Neuralink дазваляе разьмяшчаць тысячы электродаў на вонкавай паверхні чалавечага мозгу. Набор ахвотнікаў удзельнічаць у клінічных выпрабаваньнях пачнецца неўзабаве, піша DW.
Кампанія амэрыканскага бізнэсоўца Ілана Маска Neuralink, якая стварае чыпы для мозгу, атрымала дазвол праводзіць клінічныя выпрабаваньні:
«Мы рады паведаміць, што атрымалі дазвол FDA (Food and Drug Administration, Упраўленьне санітарнага нагляду за якасьцю харчовых прадуктаў і мэдыкамэнтаў. — Рэд.) на запуск нашага першага клінічнага дасьледаваньня на людзях», — паведаміла Neuralink у мікраблогу Twitter у пятніцу, 26 траўня.
У паведамленьні выказаная ўпэўненасьць у тым, што тэхналёгія Neuralink дазволіць дапамагчы шмат якім людзям. Кампанія таксама паведаміла, што набор ахвочых удзельнічаць у першых клінічных выпрабаваньнях яшчэ не пачаты, але дадатковая інфармацыя будзе абнародавана неўзабаве.
У пачатку сакавіка агенцтва Reuters, спасылаючыся на цяперашніх і былых супрацоўнікаў Neuralink, паведамляла, што FDA адмовіла Маску і яго кампаніі ў просьбе выпрабоўваць чыпы на людзях. Агенцтва тады пазначыла дзясяткі праблем, якія кампанія павінна вырашыць, перш чым праводзіць досьледы.
Перадача сыгналаў мозгу па Bluetooth
Neuralink — кампанія Маска па распрацоўцы нэўрачыпа. Ён дазволіць перадаваць сыгналы мозгу па Bluetooth. Такім чынам, зь яго дапамогай можна будзе кіраваць кампутарам або смартфонам. Мяркуецца, што капсула-прымач будзе мацавацца за вухам, як слыхавы апарат. Ад яе да мозгу будуць ісьці ніткападобныя электроды. Усяго ў мозг імплянтуюць да 1500 электродаў, кожны зь якіх у чатыры разы танчэйшы за чалавечы волас.
Па словах Маска, чып дазволіць кантраляваць гармоны, спраўляцца з трывожнасьцю і нават прымусіць мозг працаваць больш эфэктыўна. Першыя выпрабаваньні праведзены ўжо на пацуках і малпах і былі пасьпяховымі, сцьвярджаў прадпрымальнік.
У сьнежні Reuters паведамляў аб расьследаваньні ў дачыненьні да Neuralink з прычыны скаргаў на жорсткае абыходжаньне з жывёламі. Супрацоўнікі кампаніі сцьвярджалі, што выпрабаваньні на жывёлах праводзяцца ў сьпешцы і прыводзяць да іх пакут і гібелі. У распараджэньні агенцтва апынуліся дзясяткі дакумэнтаў Neuralink, якія сьведчаць аб тым, што няўдалыя тэсты даводзілася паўтараць, што павялічвалася колькасьць жывёлаў, якія тэстуюцца і забіваюцца падчас экспэрымэнтаў.
