Агенцтва Associated Presse назвала прамову сэнатара Коры Букера «рэкорднай».
У панядзелак 31 сакавіка ўвечары Букер пачаў выступ у Сэнаце, заявіўшы, што застанецца на трыбуне, пакуль будзе на гэта «здольны фізычна». Толькі праз 25 гадзін і 5 хвілін 55-гадовы сэнатар, былы футбольны абаронца, скончыў гаварыць і сышоў, крыху кульгаючы.
Ён паставіў рэкорд самай працяглай бесьперапыннай прамовы ў гісторыі Сэнату ЗША. Выконваючы правіла Сэнату, прамаўляў стоячы.
Прамова доўжылася ўсю ноч да вечара аўторка. Аратар хацеў паказаць прыклад трываласьці дэмакратаў, прадэманстраваць іх расчараваным прыхільнікам, што робіцца усё магчымае, каб процістаяць плянам Трампа, піша Associated Presse.
Букер пабіў рэкорд, пастаўлены 68 гадоў таму тагачасным сэнатарам Стромам Тэрмандам з Паўднёвай Караліны, тады дэмакратам, які ў 1957 годзе выступаў супраць Закону аб грамадзянскіх правах.
«Я тут нягледзячы на ягоны выступ», — сказаў Букер, які адкрыта расказваў у Сэнаце пра свае карані — нашчадка і рабоў, і рабаўладальнікаў.
Букер засяродзіўся на закліку да сваёй партыі праявіць рашучасьць:
«Мы ўсе павінны паглядзець у люстэрка і сказаць: „Мы зробім лепш“. Гэта ненармальны час для нашай краіны. Пагрозы амэрыканскаму народу і амэрыканскай дэмакратыі сур’ёзныя і неадкладныя, і мы ўсе павінны зрабіць больш, каб супрацьстаяць ім».
Перамінаючыся з нагі на нагу, а потым абапіраючыся на трыбуну, Букер гадзінамі выступаў супраць скарачэньня офісаў сацыяльнага забесьпячэньня, якое робіцца пад кіраўніцтвам Дэпартамэнту эфэктыўнасьці ўраду (DOGE) дарадцы Трампа Ілана Маска. Ён пералічыў наступствы ранейшых загадаў Трампа і выказаў занепакоенасьць тым, што могуць адбыцца шырэйшыя скарачэньні сеткі сацыяльнай абароны, хоць заканадаўцы-рэспубліканцы кажуць, што праграма ня будзе закранутая.
Букер таксама прачытаў лісты ад выбарнікаў. Адзін аўтар быў устрывожаны заявамі прэзыдэнта Трампа аб анэксіі Грэнляндыі і Канады і «набліжэньні канстытуцыйнага крызісу».
«Ваша сіла, ваша цьвёрдасьць, ваша яснасьць выклікаюць захапленьне, і ўся Амэрыка зважае на тое, што вы кажаце», — сказаў лідэр дэмакратаў у Сэнаце Чак Шумэр, задаючы пытаньне Букеру.
Калі Букер стаяў гадзіну за гадзінай, здавалася, што для падтрыманьня ў яго не было нічога, акрамя пары шклянак вады. Пазьней ён расказаў журналістам, што галадаў некалькі дзён перад выступам і перастаў піць вадкасць напярэдадні ўвечары.
Не маючы большасьці ні ў воднай з палатаў Кангрэсу, дэмакраты зараз амаль цалкам пазбаўленыя заканадаўчай улады, але зьвяртаюцца да працэдурных манэўраў, каб паспрабаваць спыніць рэспубліканцаў.
Форум