Лінкі ўнівэрсальнага доступу

Латушка заявіў, што мабільны тэлефон Мельнікавай з 19 сакавіка знаходзіцца на тэрыторыі Беларусі


Анжэла Мельнікава выступае на Парлямэнцкай асамблеі Рады Эўропы ў Страсбургу, 30 студзеня 2025 году
Анжэла Мельнікава выступае на Парлямэнцкай асамблеі Рады Эўропы ў Страсбургу, 30 студзеня 2025 году

«На гэты момант мы можам паведаміць, што мабільны тэлефон Анжалікі Мельнікавай з 19 сакавіка знаходзіцца на тэрыторыі Беларусі. Гэта ўстаноўлена намі тэхнічным спосабам», — напісаў 31 сакавіка ў сваім тэлеграм-канале намесьнік кіраўніка Аб’яднанага пераходнага кабінэту Павал Латушка.

Аднак доказаў сваім словам ён не прывёў.

Раней зьявілася інфармацыя, што сьпікерка КР Анжаліка Мельнікава, хутчэй за ўсё, знаходзіцца не на тэрыторыі ЭЗ. Паводле зьвестак сакратарыяту Каардынацыйнай рады, яе былы муж можа цяпер быць у Беларусі.

Паводле інфармацыі @euroradio, дэлегаты КР ня бачылі Мельнікаву ўжо некалькі тыдняў, бо яна хварэла на COVID-19. Але яна заставалася на сувязі прынамсі да 21 сакавіка. Дочкі Мельнікавай таксама зьніклі.

Пра тое, што Мельнікава не на тэрыторыі Польшчы і не выходзіць на сувязь з 25 сакавіка, «Позірку» паведаміла 28 сакавіка прэс-служба Латушкі.

«Мы спадзяемся на лепшае, але разумеем, што першыя асобы дэмакратычных сілаў Беларусі зьяўляюцца прыярытэтнымі цэлямі спэцслужбаў рэжымаў у Беларусі і Расеі. Мною афіцыйна пададзена заява ў праваахоўныя органы Польшчы аб зьнікненьні сьпікера КР Анжалікі Мельнікавай. На просьбу праваахоўных органаў гэтая інфармацыя не выдавалася», — сказаў тады Латушка.

Паўнамоцтвы кіраўніка КР часова перайшлі да віцэ-сьпікеркі Станіславы Гліньнік — «у сувязі зь немагчымасьцю» для Мельнікавай «выконваць свае абавязкі».

Раніцай 29 сакавіка прэс-сакратар міністра ўнутраных справаў і адміністрацыі Польшчы Яцэк Дабжыньскі паведаміў: польскія службы «атрымалі інфармацыю аб тым, што прадстаўнікі Каардынацыйнай рады Беларусі ўжо некалькі дзён ня могуць зьвязацца з старшынёй Рады Анжалікай Мельнікавай».

«Згодна з дадзенымі польскіх і партнэрскіх службаў, гэтая асоба знаходзілася за межамі Польшчы на працягу многіх тыдняў. Польскія службы будуць падтрымліваць дзеяньні службаў іншых краін і Каардынацыйнай рады Беларусі для вызначэньня месца знаходжання спадарыні Мельнікавай», — напісаў ён на сваёй старонцы ў сацыяльнай сетцы Х.

У сваю чаргу КР «з улікам інфармацыі, якая зьяўляецца ў СМІ» паведаміла, што «працягвае сачыць за сытуацыяй вакол зьнікненьня Анжалікі Мельнікавай».

«На гэты момант месца яе знаходжаньня застаецца невядомым. Пошукі працягваюцца, і мы робім усё магчымае, каб даведацца пра яе лёс і пераканацца, што яе жыцьцю і здароўю нічога не пагражае», — адзначаецца ў паведамленьні.

Заяўлена, што рада «зьвярнулася да донараў з афіцыйным запытам, ці былі ажыцьцёўленыя пераводы сродкаў для дзейнасьці КР на рахунак фундацыі Анжалікі Мельнікавай».

«Просім усіх прадстаўнікоў мэдыя і грамадзкасці не распаўсюджваць непацьверджаную інфармацыю і ўстрымлівацца ад спэкуляцый, якія могуць пашкодзіць як самой Анжаліцы, так і яе блізкім, — заклікала Каардынацыйная рада. — Сёньня найважнейшым для нас зьяўляецца бясьпека і вызначэньне месца знаходжаньня Анжалікі. Мы заклікаем усіх праяўляць адказнасьць і чалавечнасьць ў такой складанай сытуацыі».

У СМІ зьявілася інфармацыя, што Мельнікава самастойна вылецела з Польшчы, як заяўлялася, у Вялікую Брытанію, «пасьля чаго яе след згубіўся». СМІ таксама адзначылі, што невядома, дзе яе дочкі (6 і 12 гадоў).

Мельнікава была абраная сьпікеркаю Каардынацыйнай рады трэцяга скліканьня 11 ліпеня 2024 году ад блёку «Каманда Латушкі і Рух „За Свабоду“», які значна апярэдзіў астатнія кааліцыі колькасьцю атрыманых галасоў і ў выніку заняў 28 з 80 месцаў у КР.

Гліньнік, унучка былога старшыні Вярхоўнага Савету Станіслава Шушкевіча, зьяўляецца асабістай памочніцай кіраўніцы АПК Сьвятланы Ціханоўскай. Сябра фракцыі КР «Эўрапейскі выбар» (8 месцаў).

Хто такая Анжаліка Мельнікава

Прадстаўніцу сьпісу «Каманда Латушкі і рух „За свабоду“» Анжаліку Мельнікаву абралі сьпікеркай Каардынацыйнай рады ў ліпені 2024 году.

Мельнікава скончыла Менскі дзяржаўны лінгвістычны ўнівэрсытэт і Беларускі дзяржаўны эканамічны ўнівэрсытэт. Да 2018 году была намесьніцай генэральнага дырэктара «Кока-Кола Беўрыджыз Беларусія», пасьля пайшла ў дэкрэтны адпачынак. У 2020-м яе двойчы затрымлівалі на пратэстах, сям’я выехала зь Беларусі.

З чэрвеня 2022 году яна была каардынатаркай праектаў «Народнага антыкрызіснага ўпраўленьня» на чале з Паўлам Латушкам.

Выступаючы на паседжаньні Каардынацыйнай рады 10 ліпеня 2024 году, яна назвала асноўнымі кірункамі сваёй дзейнасьці ў выпадку выбраньня «працу ў інтарэсах беларусаў і вырашэньне канкрэтных праблем людзей», пашырэньне паўнамоцтваў КР і яе ўзаемадзеяньня з АПК, узьняцьце ўзроўню і прэстыжу КР, структурызацыю і якаснае асьвятленьне яе працы.


Ігар Лосік Кацярына Андрэева Ірына Слаўнікава Марына Золатава
XS
SM
MD
LG