Лінкі ўнівэрсальнага доступу

У Эўракамісіі заявілі, што «Эўропа гатовая адказаць» на ўведзеныя Трампам мыты. Кітай абяцаў «жорсткія контразахады»


Кіраўніца Эўракамісіі Урзуля фон дэр Ляен
Кіраўніца Эўракамісіі Урзуля фон дэр Ляен

Кіраўніца Эўракамісіі Урзуля фон дэр Ляен трэцяга красавіка заявіла, што «Эўропа гатовая адказаць» на ўведзеныя прэзыдэнтам ЗША Дональдам Трампам мыты. Кітай, у сваю чаргу, абяцаў прыняць «жорсткія контразахады».

2 красавіка прэзыдэнт ЗША Дональд Трамп аб’явіў, што ўводзіць новыя мыты на імпарт тавараў у ЗША. На тавары з Кітаю яны складуць 34%, на імпарт з краін Эўразьвязу — 20%, зь Японіі — 24%, зь Індыі — 26%.

Абвешчаныя прэзыдэнтам ЗША мыты наносяць «сурʼёзны ўдар», на які «Эўропа гатовая адказаць»,— заявіла кіраўніца Эўракамісіі Урзуля фон дэр Ляен.

«Унівэрсальныя мыты, абʼяўленыя ЗША, наносяць сурʼёзны ўдар па прадпрыемствах і спажыўцах ва ўсім сьвеце. Эўропа гатовая адказаць. Мы заўсёды будзем абараняць нашы інтарэсы і каштоўнасьці. Мы таксама гатовыя да супрацы. І перайсьці ад канфрантацыі да перамоваў», — напісала яна ў сацыяльнай сетцы X.

Фон дэр Ляен сказала журналістам, што падзяляе пазыцыю Трампа ў тым, што некаторыя атрымліваюць «несправядлівую выгаду» з прычыны заганаў глябальнай гандлёвай сыстэмы. Аднак уведзеныя мыты, на яе думку, не дапамогуць «паправіць» сыстэму.

Паводле яе, Эўразьвяз заканчвае працу над мерамі супраць ЗША ў адказ на ўведзеныя мыты на сталь і алюміній і рыхтуецца да далейшых контразахадаў, каб «абараніць свае інтарэсы і сваё прадпрымальніцтва, калі перамовы сарвуцца».

Кітай таксама рыхтуецца прыняць «жорсткія контразахады» ў адказ на ўведзеныя ЗША мыты, паведаміла 3 красавіка прэс-служба Міністэрства камэрцыі Кітаю.

«Кітай рашуча выступае супраць гэтага, мы прымем цьвёрдыя контразахады для абароны нашых уласных правоў і інтарэсаў», — заявілі ў ведамстве.

На думку Міністэрства камэрцыі Кітаю, мыты, уведзеныя Злучанымі Штатамі «на падставе субʼектыўных і аднабаковых ацэнак», не адпавядаюць правілам міжнароднага гандлю, наносяць сурʼёзныя страты законным правам і інтарэсам адпаведных бакоў, гэта «тыповая практыкай аднабаковага запалохваньня».

Кітай заклікаў Злучаныя Штаты «неадкладна скасаваць» новыя мыты і «належным чынам урэгуляваць рознагалосьсі з сваімі гандлёвымі партнэрамі шляхам раўнапраўнага дыялёгу».

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава
XS
SM
MD
LG