Міністры замежных справаў краін NATO 3 красавіка адкрыюць двухдзённую сустрэчу ў Брусэлі, каб абмеркаваць умацаваньне абароннага патэнцыялу альянсу, бо эўрапейскія сябры арганізацыі сутыкаюцца з усё большым ціскам з боку Злучаных Штатаў, каб яны выдаткоўвалі больш сродкаў на абарону.
Генэральны сакратар NATO Марк Рутэ настойвае на тым, што Злучаныя Штаты адданыя альянсу, нягледзячы на заявы, што прэзыдэнт ЗША Дональд Трамп падрывае трансатлянтычныя адносіны. «Я ведаю, што былі некаторыя жорсткія выразы. Я ведаю, што была занепакоенасьць саюзьнікаў па гэты бок акіяну доўгатэрміновымі абавязаньнямі ЗША перад NATO», — сказаў Рутэ.
«Амэрыканцы зноў і зноў заяўлялі: „Мы адданыя NATO. Мы адданыя 5-му артыкулу“, — сказаў Рутэ, маючы на ўвазе абавязак калектыўна абараняць альянс. — Я абсалютна перакананы, што гэты альянс мае заставацца з ЗША. Іхныя абавязаньні абсалютна відавочныя», — сказаў Рутэ.
Хаўрусьнікі ў NATO поўныя рашучасьці выступіць адзіным фронтам, каб супрацьстаяць поўнамаштабнаму ўварваньню Расеі ва Ўкраіну, але эўрапейскія саюзьнікі лічаць, што іхныя намаганьні былі адсунутыя на другі плян.
Імкнучыся да хуткага пагадненьня аб спыненьні агню, Вашынгтон выказаў меркаваньне, што Ўкраіне, магчыма, давядзецца пайсьці на тэрытарыяльныя саступкі і зрабіць крок для аднаўленьня дыялёгу з Расеяй.
Чакаецца, што ў сустрэчы возьмуць удзел дзяржаўны сакратар ЗША Марка Рубіё, міністар замежных справаў Украіны Андрэй Сыбіга і прадстаўніца Эўразьвязу ў замежнай палітыцы Кая Калас.
Рубіё можа чакаць пытаньняў ад саюзьнікаў, устрывожаных, раззлаваных і зьбянтэжаных крокамі адміністрацыі Трампа для наладжваньня адносінаў з Расеяй і яе рытарычнымі атакамі на даўніх трансатлянтычных партнэраў.
Эўрапейскія службоўцы, зыходзячы з таго, што яны бачылі і чулі ад пачатку ўступленьня Трампа на пасаду ў студзені, выказвалі глыбокую заклапочанасьць наконт будучай ролі ЗША ў альянсе.
Рубіё, падобна, таксама будзе вымушаны растлумачыць заяўленае Трампам жаданьне зрабіць Канаду 51-м штатам, а таксама яго імкненьне анэксаваць Грэнляндыю — аўтаномію ў складзе Каралеўства Даніі, сябра NATO.
Рубіё мае прыбыць у Брусэль 3 красавіка. Разам зь ім прыедзе нядаўна зацьверджаны амбасадар ЗША ў NATO Мэт Ўітакер.
Чакаецца, што Рубіё будзе пераконваць эўрапейскіх саюзьнікаў павялічыць выдаткі на абарону, каб разьмеркаваць гэты цяжар.
Чакаецца, што кіраўнікі NATO ў чэрвені прымуць рашэньне падвысіць цяперашні мінімум выдаткаў на абарону ў 2 працэнты валавога ўнутранага прадукту (ВУП) для кожнай краіны-чальца.
Адміністрацыя Трампа вылучыла ідэю мінімуму ў 5 працэнтаў ВУП. Рутэ настойвае, каб кожны хаўрусьнік узяў на сябе абавязаньне выдаткаваць на абарону ня менш за 3,7% ВУП як мага хутчэй і з рэгулярнымі справаздачамі аб прагрэсе. Некаторыя эўрапейскія саюзьнікі ня захочуць браць на сябе занадта вялікія абарончыя абавязаньні занадта хутка з увагі на тое, што яны змагаюцца зь нізкімі тэмпамі росту і ростам бюджэтнага дэфіцыту.
Чакаецца, што міністар Сыбіга дасьць абноўленую інфармацыю аб сытуацыі на полі бою ва Ўкраіне. У той час як сяброўства Ўкраіны ў NATO на гэты момант не разглядаецца, большасьць эўрапейскіх саюзьнікаў хочуць прынамсі атрымаць запэўненьні, што надалей ва Ўкраіну будзе паступаць амэрыканская зброя і будзе дзейнічаць навучальная місія NATO для ўкраінскіх салдатаў.
Аднак Злучаныя Штаты больш не ўзначальваюць кантактную групу ў пытаньнях абароны Ўкраіны, вядомую як група Рамштайн, якая каардынуе вайсковую падтрымку для Кіева. Вялікая Брытанія старшынявала на апошнім пасяджэньні групы ў лютым, а наступнае, папярэдне заплянаванае на 11 красавіка, мае прайсьці пад сустаршынствам Вялікай Брытаніі і Францыі.
Форум