Прэзыдэнта Паўднёвай Карэі Юн Сук Ёля, якому раней аб’явілі імпічмэнт, затрымалі ў сераду падчас масавай апэрацыі праваахоўных органаў у прэзыдэнцкім комплексе, дэманстратыўна настойваючы, што антыкарупцыйнае агенцтва ня мае паўнамоцтваў расьсьледаваць ягоныя дзеяньні. Але пры гэтым заявіў, што падпарадкаваўся, каб перадухіліць гвалт.
У відэазвароце, запісаным перад тым, як яго суправаджалі ў штаб-кватэру агенцтва барацьбы з карупцыяй, Юн паскардзіўся на тое, што «вяршэнства закону цалкам развалілася ў гэтай краіне».
Юн першы дзейны прэзыдэнт краіны, якога арыштавалі. На працягу некалькіх тыдняў ён хаваўся ў рэзыдэнцыі Ханам-дон у сталіцы Сэуле, паабяцаўшы «змагацца да канца» з намаганьнямі для яго адхіленьня. Ён абгрунтаваў сваю дэклярацыю аб увядзеньні ваеннага становішча 3 сьнежня як законны акт кіраваньня супраць «антыдзяржаўнай» апазыцыі, якая выкарыстоўвае сваю заканадаўчую большасьць, каб сарваць яго пляны.
Юн быў узяты пад варту прыкладна празь пяць гадзін пасьля таго, як сьледчыя прыбылі ў прэзыдэнцкі комплекс і прыкладна праз тры гадзіны пасьля таго, як яны пасьпяхова ўвайшлі ў рэзыдэнцыю, пры другой спробе затрымаць яго за ўвядзеньне ваеннага становішча.
Група чорных бездарожнікаў, некаторыя зь якіх былі абсталяваныя сырэнамі, пакідала прэзыдэнцкую тэрыторыю ў суправаджэньні паліцыі. Пазьней Юна заўважылі, як ён выйшаў з аўтамабіля пасьля прыбыцьця ў штаб-кватэру агенцтва ў суседнім горадзе Гвачхон.
Юна могуць трымаць пад вартай некалькі тыдняў.
Антыкарупцыйнае агенцтва, якое вядзе сумеснае расьсьледаваньне з паліцыяй і вайскоўцамі наконт таго, ці было аб’яўленьне Юнам ваеннага становішча спробай мяцяжу, мае 48 гадзін, каб запытаць пастанову суду аб афіцыйным арышце па абвінавачваньні ў спробе паўстаньня, і калі суд гэтага ня зробіць, Юна вызваляць. Калі Юн будзе афіцыйна арыштаваны, сьледчыя могуць падоўжыць яго затрыманьне да 20 дзён, перш чым перадаць справу пракуратуры для выстаўленьня канчатковага абвінавачаньня.
Прэзыдэнцкія паўнамоцтвы Юна былі прыпыненыя, калі 14 сьнежня парлямэнт абвясьціў яму імпічмэнт. Зараз справа аб імпічмэнце знаходзіцца на разглядзе Канстытуцыйнага суду, які можа афіцыйна адхіліць Юна ад пасады або адхіліць справу і аднавіць яго на пасадзе.
Форум