Хроніка перасьледу 26 чэрвеня: у Менску затрымалі мэнэджара страхавой кампаніі

Жорсткае затрыманьне ў Менску

26 чэрвеня раніцай на вуліцы Ўсходняй у Менску жорстка затрымалі хлопца, піша Праваабарончы цэнтар «Вясна».

Як паведамляюць відавочцы, затрыманьне адбылося каля 9-й раніцы — трое чалавек у цывільным накінуліся на менчука і павалілі на зямлю. На крыкі хлопца аб дапамозе выйшла ягоная маці, якой сказалі, што яе сына вязуць у Першамайскі РУУС.

ГЛЯДЗІЦЕ ТАКСАМА:

Хроніка перасьледу 19 чэрвеня: у Баранавічах затрымалі школьнага настаўніка, у Менску судзяць сястру палітвязьня

Сілавікі затрымалі намесьніка начальніка ўпраўленьня страхавой кампаніі

Відэа з затрыманым апублікаваў праўладны тэлеграм-канал.

На камэру мужчына кажа, што працуе намесьнікам начальніка ўпраўленьня па ўрэгуляваньні страт адной са страхавых кампаній, паведамляе «Медиазона». У 2020 годзе ўдзельнічаў у пратэстах і быў падпісаны на «экстрэмісцкія» і «тэрарыстычныя» тэлеграм-каналы.

Затрымліваць яго прыехалі мінімум 5 узброеных аўтаматамі сілавікоў у рыштунку.

Паводле якога артыкулу затрымалі мужчыну і дзе ён цяпер знаходзіцца, невядома.

ГЛЯДЗІЦЕ ТАКСАМА:

Хроніка перасьледу 10 чэрвеня: палітвязьня затрымалі па вызваленьні з калёніі