Прадстаўнік штабу патэнцыйнага кандыдата ў прэзыдэнты Валера Цапкалы Сяргей Лаўрэнкін расказаў на Facebook пра аналіз прычын адхіленьня подпісаў за кандыдата Цэнтральнай выбарчай камісіяй.
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Як піша Сяргей Лаўрэнкін, 94,36% подпісаў забракавалі ў выбарчых камісіях за тое, што дата каля подпісу была пастаўленая нібыта ня тым жа чалавекам, які подпісаўся.
«Гэта азначае, што подпісы былі сабраныя ідэальна і па-сапраўднаму падкапацца проста не было да чаго, — мяркуе ён. — Таму давялося выкручвацца і шаманіць па-чорнаму».
Раней Лаўрэнкін адзначаў, што дзясяткі тысяч подпісаў праверылі за адзін дзень — і за гэты час нібыта пасьпелі выявіць, што почырк у даце не падобны да почырку ў подпісе. Ён мяркуе, што подпісы «наогул ніхто не правяраў»: зазначае, што адзін з прынятых ЦВК падпісных лістоў ня меў завяральнага подпісу чальца ініцыятыўнай групы, а такі можна было адбракаваць нават без аналізу почыркаў.
Падчас праверкі адбракаваных подпісаў штаб Цапкалы высьветліў, што не прынялі подпісы некалькіх працаўнікоў выканкаму Фрунзэнскага раёну Менску. Да іх вырашылі зайсьці ў госьці і прапанаваць напісаць заяву пра тое, што даты і подпісы яны паставілі самі, піша Лаўрэнкін, тыя абурыліся і напісалі на штаб заявы ў ЦВК і Вярхоўны суд.
Зьбіральнік подпісаў Юры Гушча дадае: неадпаведнасьць почыркаў у подпісах і датах выявілі не праз почырказнаўчую экспэртызу. Зь ліставаньня, паказанага штабу, вынікае, што запыт на экспэртызу з выбаркаму ў Дзяржаўны камітэт судовых экспэртызаў падалі на наступны дзень па завяршэньні праверкі подпісаў. Акрамя таго, яшчэ на этапе прыёму подпісаў выявілі нястачу 757 здадзеных подпісаў.
Штаб Цапкалы сьцьвярджаў, што за яго вылучэньне ў кандыдаты сабралі звыш 200 тысяч подпісаў, пасьля зьверкі ў выбаркамы здалі 160 тысяч. Аднак Цэнтарвыбаркам прызнаў толькі 75 тысяч, што недастаткова для рэгістрацыі кандыдатам у прэзыдэнты.
Старшыня ЦВК Лідзія Ярмошына заяўляла, што хоць за Цапкалу не прызналі 100 тысяч подпісаў, дакумэнты на рэгістрацыю ўсё роўна будуць разглядаць. Чакаецца, што паседжаньне ЦВК пройдзе 14 ліпеня.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
