د پاکستان حکومت او وسله والې ډلې تحريک طالبان پاکستان د يوه تړون له مخې پر يوه مياشتني اوربند سلا شوي دي. دا په داسې حال کې ده چې په تېرو څو مياشتو کې د وسله والو طالبانو حملې زیاتې شوې دي. حکومت تحريک طالبان پاکستان ترهګره ډله ګرځولې او ورباندې يې بندېز لګولی دی. په ۲۰۰۷ز کال جوړې شوې دې ډلي په ګڼ شمېر هدفي وژنو، بمي او ځانمرګو بريدونو کې په زرګونه کسان وژلي دي. خو اوس حکومت تمه لري چې له دې ډلې سره به د خبرو اترو په نتيجه کې په هېواد کې د تشدد لړۍ تم شي. ایا داسې به وشي؟ دا او نورې پوښتنې د مشال تر رڼا لاندې بحث کې څېړل شوې دي.
د مشال تر رڼا لاندې
چار شنبه ۱۰ نومبر ۲۰۲۱
د برېتانيا په ګلاسکو ښار کې د اب و هوا بدلون او نړيوالې تودښې د مخنيوي په اړه د کوپ-۲۶ کانفرنس د اکتوبر پر ۳۱مه پیل شوی چې د نومبر تر ۱۲مې به دوام لري. دې ته د نړۍ د بېلا بېلو هېوادونو مشرانو ويناګانې کوي. په دې کې د نړۍ ۲۰۰ هېوادونو ته ويل شوي چې تر ۲۰۳۰ز کاله د زهرجنو ګیسونو د کمولو په اړه خپل پلان وړاندې کړي. د اب و هوا بدلون دا مهال نړۍ ته تر ټولو لوی خطر بلل کېږي. پاکستان په هغو هېوادونو کې دی چې د اب و هوا د بدلون د مخنيوي لپاره يې د يو ارب ونو لګولو منصوبه پیل کړې ده. ټاکل شوې وه چې د پاکستان وزیراعظم عمران خان به په کانفرنس کې ګډون کاوه خو د هېواد د داخلي سياست له وجې يې سفر وځنډاوه خو د دې هېواد د اب و هوا بدلون د مملکت وزيرې سرتاج ګل په مشرۍ ۱۰ کسيزه ډله په کانفرنس کې ګډون کوي. د مشال تر رڼا لاندې کې د کوپ -۲۶ مې سرمشريزې ته په کتو سره په پاکستان په تېره بيا خيبرپښتونخوا او بلوچستان ته د اب و هوا د بدلون ګواښ څېړل شوی دی.
