Інтэрпол адмовіўся ад камэнтароў, піша Reuters. Але дзяржаўны суд Босьніі пацьвердзіў агенцыі, што чырвонае апавяшчэньне, якое звычайна выдаецца для міжнародных уцекачоў, не ўступіла ў сілу.
«Усе астатнія акалічнасьці і зьвесткі лічацца канфідэнцыйнымі, таму суд ня можа камэнтаваць падрабязных прычынаў рашэньня Інтэрполу», — гаворыцца ў паведамленьні суду.
У лютым Міларад Додзік быў асуджаны на год пазбаўленьня волі і пазбаўлены права на палітычную дзейнасьць на працягу шасьці гадоў за ігнараваньне рашэньняў Кабінэту міжнароднага прадстаўніка. На мінулым тыдні басьнійскі суд пастанавіў выдаць міжнародны ордэр на арышт Додзіка і ягонага памочніка за атаку на канстытуцыйны парадак. Гэта адбылося пасьля таго, як яны выехалі за мяжу насуперак унутранаму ордэру на арышт.
«Нас інфармуюць, што генэральны сакратарыят Інтэрполу ацаніў на падставе нашай ноты пратэсту і тлумачэньняў бялградзкага бюро Інтэрполу, што запыт не адпавядае артыкулу 3 Статуту і што ўмовы для выдачы ордэраў не былі выкананыя», — гаворыцца ў заяве кабінэту міністра ўнутраных спраў Сэрбіі Івіцы Дачыча.
Додзік прывітаў гэтую навіну, заявіўшы, што рашэньне Інтэрполу ёсьць доказам «палітычнай матываванасьці» ордэру.
Пасьля гэтых вестак 3 красавіка Додзік вярнуўся ў Босьнію. За апошнія дні ён наведаў Сэрбію, Ізраіль і Расею. Босьнія складаецца з дзьвюх аўтаноміяў: Рэспублікі Сэрбскай і Басьнійска-Харвацкай Фэдэрацыі. Фэдэральны ўрад вінаваціць Додзіка ў падрыве асноваў басьнійскай дзяржавы і сэпаратызьме.
Будучы даўнім прыхільнікам аддзяленьня ад Босьніі, Додзік ініцыяваў закон, які забараняе дзяржаўнай юстыцыі і паліцыі дзейнічаць у сэрбскім рэгіёне, але канстытуцыйны суд Босьніі часова прыпыніў дзеяньне распараджэньня Додзіка.
Форум