У чэргах на паляпшэньне жыльлёвых умоваў у вобласьцях Беларусі стаіць каля 5,5-6% насельніцтва, у Менску — 9% (агулам 569 тысяч сем’яў), паведаміла падчас круглага стала ў часопісе «Экономика Беларуси» Надзея Якушава, намесьніца начальніка аддзелу юрыдычнай работы міністэрства ЖКГ, піша БЕЛТА.
«За апошнія 5 гадоў чаргавікоў стала менш на 12%, або на 80 тысяч, гэта значыць фактычна зьнятая з чаргі цэлая Менская вобласьць, у якой сёньня 82 тысячы семʼяў, што жадаюць палепшыць жыльлёвыя ўмовы. Практыка паказвае: тыя, хто сапраўды мерыцца пабудаваць кватэру або дом, вырашаюць пытаньне за год-два, максымум 5 гадоў», — пракамэнтавала Надзея Якушава.
Паводле яе слоў, летась з 3,5 тысячы шматдзетных менчукоў-«чаргавікоў» каля 1,7 тысячы — то бо палова — адмовіліся заключаць дамовы долевага будаўніцтва.
Першая прычына адмоваў: сытуацыя, калі людзі ўжо маюць ва ўласнасьці жыльлё, а каб набыць новае, трэба даплочваць «істотную суму». Напрыклад: калі сям’я мае ва ўласнасьці двухпакаёвую кватэру 50 кв.м., то пры будаваньні 100-мэтровай чатырохпакаёвай кватэры яна атрымае льготны крэдыт і субсыдыю толькі на 50 кв.м — з вылікам наяўнай жылой плошчы.
Другая прычына — людзі чакаюць пачатку будаўніцтва ў іншых месцах.
Акрамя таго, паводле спэцыялісткі, у Менску «зазначылася тэндэнцыя зьніжэньня дынамікі шматдзетных семʼяў, якія стаюць на ўлік». За год іх большае на 600-800, у той час як раней штогод прыбаўлялася больш за 1000.
- Паводле зьвестак на ліпень 2024 году, за тры гады ў Беларусі плошча ўведзенага ў эксплуатацыю жытла для тых, хто мае патрэбу ў паляпшэньні жыльлёвых умоваў, зьменшылася ў 1,53 раза, а пабудаванага зь дзяржаўнай падтрымкай — у 1,74 раза.
Форум