У Міністэрстве ўнутраных спраў Грузіі паведамілі, што ў сакавіку з тэрыторыі краіны дэпартавалі 97 іншаземцаў.
«Некаторыя іншаземныя грамадзяне пакінулі Грузію добраахвотна, а іншыя былі прымусова высланыя з краіны ў выніку мер Дэпартамэнту па міграцыі. Высланым асобам забаронены ўезд у краіну ў адпаведнасьці з заканадаўствам», — адзначаецца ў афіцыйным паведамленьні.
Сярод дэпартаваных грамадзяне Індыі, Беларусі, Кітаю, Таджыкістану, Азэрбайджану, Расеі, Банглядэш, ЗША, Ірака, Ірана, Нігерыі, Туркмэністана, Турэччыны, Эгіпта, Пакістану, Камэруна, Ярданіі і Кіргізстану.
У той жа час у МУС Грузіі не ўдакладнілі колькасьць дэпартаваных грамадзян кожнай згаданай краіны.
Згодна з грузінскім заканадаўствам, грамадзяне Беларусі могуць знаходзіцца на тэрыторыі Грузіі цягам аднаго году.
На пачатку 2025 году ў Грузі пражывалі прыблізна 12 тысяч грамадзян Беларусі.
У 2019–2024 гадах Грузія не задаволіла ніводнага хадайніцтва беларускіх грамадзян аб наданьні ім прытулку.
26 сакавіка суд у Тбілісі адмяніў рашэньне міграцыйнага дэпартамэнта Грузіі аб адмове ў прытулку беларускаму праваабаронцу Раману Кісьляку. Цяпер прашэньне аб наданьні прытулку павінны перагледзець.
Форум