Суд Чыгуначнага раёну Віцебска асудзіў пяць жыхарак Віцебску, якія ўдзельнічалі ў зьнішчэньні тысячаў дозаў вакцыны ад каранавірусу, паведамілі ў абласной пракуратуры. Ідзецца пра мэдыкаў гарадзкой паліклінікі № 6, удакладняе рэгіянальны рэсурс «Витебск, я гуляю! | Новости Витебска».
Паводле пракуратуры, намесьніца загадчыка і старшая мэдсястра, перавышаючы службовыя паўнамоцтвы, далі незаконныя ўказаньні тром падначаленым ім мэдсёстрам зьнішчыць рэшткі вакцыны супраць каранавірусу COVID-19, тэрмін прыдатнасьці якой ня скончыўся, і даручылі напісаць ва ўліковых і справаздачных дакумэнтах, што вакцыну выкарысталі для вакцынацыі. У пракуратуры не называюць імёнаў асуджаных.
Пра суд над супрацоўнікамі гарадзкой паліклінікі № 6, які пачаўся 20 лютага, раней таксама пісала рэгіянальнае выданьне «Віцебскі кур’ер». Паводле выданьня, на лаве падсудных апынуліся:
- Ірына Кочава, былая намесьніца загадчыка паліклінікі № 6;
- Сьвятлана Савіцкая, былая старшая мэдсястра паліклінікі;
- Марына Каголь, якая раней працавала мэдыкам у той жа паліклініцы № 6;
- Вікторыя Рудзеня
- Мазур (імя не названае).
Паводле пракуратуры, агулам мэдсёстры паліклінікі зьнішчылі прынамсі 6 тысяч вакцын коштам ня менш як 120 тысяч беларускіх рублёў.
На судзе абвінавачаныя цалкам прызналі віну.
Дзеяньні намесьніцы загадчыка і старшай мэдсястры кваліфікавалі як перавышэньне службовых паўнамоцтваў з асабістай зацікаўленасьці, што прывяло да цяжкіх наступстваў, а трох мэдсёстраў судзілі за дапамогу ва ўказаным злачынстве ( ч. 6 арт. 16, ч. 3 арт. 426 КК).
У выніку намесьніцу загадчыка і старшую мэдсястру асудзілі на 3 гады 6 месяцаў «хатняй хіміі » (абмежаваньне волі без накіраваньня ў папраўчую ўстанову адкрытага тыпу), а трох мэдсёстраў — па 2 «хатняй хіміі» кожнай.
Гэта ўжо другі выпадак у Віцебску, калі мэдыкаў судзілі за зьнішчэньне вакцыны ад каранавірусу. Летась за зьнішчэньне 4,5 тысячы дозаў вакцыны мэдычную работніцу асудзілі на 5 гадоў пазбаўленьня волі з адтэрмінаваньнем на 3 гады.
Былі падобныя выпадкі ў іншых вобласьцях Беларусі. Так, у Гомлі ў чэрвені 2024 году асудзілі загадчыцу аддзяленьня прафіляктыкі, старшую мэдсястру і мэдсястру кабінэту прышчэпак адной з гарадзкіх паліклінік, якія завышалі статыстыку вакцынацыі супраць грыпу і каранавірусу, а пасьля зьнішчалі нявыкарыстаныя вакцыны.
- Падчас пандэміі COVID-19 у Беларусі ўлады значна заніжалі афіцыйную статыстыку сьмяротнасьці ад каранавірусу, а потым і зусім перасталі яе публікаваць. Некаторыя мэдыкі расказвалі, што беларусы неахвотна вакцынаваліся расейскай і кітайскай вакцынай ад каранавірусу, таму вядомыя выпадкі, калі мэдычныя ўстановы завышалі колькасьць вакцынаваных, каб паказаць добрую статыстыку, а пасьля зьнішчалі вакцыну.
Форум