Канстытуцыйны суд Паўднёвай Карэі зацьвердзіў імпічмэнт прэзыдэнта Юн Сок Ёля, зьнятага з пасады пасьля спробы ўвесьці ў краіне ваеннае становішча, паведамляе Yonhap. Цягам 60 дзён у краіне павінны прайсьці нечарговыя прэзыдэнцкія выбары.
Усе восем судзьдзяў аднагалосна вырашылі, што прэзыдэнт Паўднёвай Карэі Юн Сок Ёль перавысіў свае паўнамоцтвы, калі ўвёў у краіне ваеннае становішча ў сьнежні 2024 году. Згодна з Канстытуцыяй Паўднёвай Карэі, прэзыдэнт можа аб’явіць ваеннае становішча падчас вайны або эквівалентнай надзвычайнай сытуацыі ў краіне.
Для зацьвярджэньня імпічмэнту трэба было атрымаць галасы сама меней шасьці судзьдзяў. Рашэньне канчаткова адхіляе Юн Сок Ёля ад улады.
Цяпер у Паўднёвай Карэі павінны прайсьці нечарговыя прэзыдэнцкія выбары. Чакаецца, што яны адбудуцца 3 чэрвеня 2025 году. У гэты час абавязкі кіраўніка дзяржавы працягне выконваць прэмʼер Хан Док Су.
- Юн Сок Ёль стаў першым дзейным прэзыдэнтам сучаснай Паўднёвай Карэі, адпраўленым пад арышт. Трэцяга студзеня сьледчыя не змаглі прывесьці ордэр на арышт у выкананьне, бо ім супрацьстаяла служба бясьпекі адхіленага ад улады прэзыдэнта. 15 студзеня сьледчыя дзяржаўнага антыкарупцыйнага агенцтва Паўднёвай Карэі з другой спробы арыштавалі Юн Сок Ёля з абвінавачаньнем ў мяцяжы і павезьлі на допыт. 18 студзеня суд пастанавіў узяць яго пад варту.
- У лютым палітык падаў апэляцыю ў Цэнтральны акруговы суд Сэулу. Суд стаў на ягони бок і вызваліў з-пад варты ў пачатку сакавіка, аднак разгляд самой справы аб мяцяжы працягваецца. Тэарэтычна Юн Сок Ёлю за мяцеж на дзяржаўнай пасадзе можа пагражаць нават сьмяротнае пакараньне, але ў Паўднёвай Карэі нікога не караюць сьмерцю ўжо 30 гадоў.
- Трэцяга сьнежня 2024 году на той момант прэзыдэнт Паўднёвай Карэі Юн Сок Ёль абʼявіў пра ўвядзеньне ваеннага становішча ў краіне «дзеля барацьбы з унутранымі прыхільнікамі КНДР». Указ забараняў працу палітычных партыяў, пратэсты, страйкі, уводзіў цэнзуру і ваенна-палявыя трыбуналы з правам на вынясеньне сьмяротнага прысуду. Указ дзейнічаў шэсьць гадзін і выклікаў маштабныя пратэсты як на вуліцах Сэулу, так і ў парлямэнце. Дэпутаты падчас штурму будынку парлямэнту вайскоўцамі прагаласавалі за скасаваньне рашэньня прэзыдэнта. Пасьля гэтага ён паводле закону быў вымушаны скасаваць указ.
- 14 сьнежня 2024 году парлямэнт Паўднёвай Карэі прагаласаваў за імпічмэнт Юн Сок Ёля.
Форум