Цяпер беларусы павінны будуць паведамляць мэту візыту ў Латвію і падаваць зьвесткі аб працы ў дзяржаўных установах і службе ў войску.
Зьменыя прадугледжаныя папраўкамі да Іміграцыйнага закона і закона «Аб дзяржаўнай мяжы», якія 3 красавіка ў канчатковым чытаньні зацьвердзіў Саэйма Латвіі, паведамляе Delfi.lv.
Зьмены прадугледжваюць патрабаваньне для грамадзян трэціх краін (у тым ліку беларусаў), у якіх няма выдадзенай у Латвіі візы або дазволу на жыхарства, за 48 гадзін да ўезду ў Латвію падаваць канкрэтныя зьвесткі пра мэту паездкі, меркаваны тэрмін знаходжаньня ў Латвіі, месца пражываньня, маршрут перамяшчэньня і кантактную інфармацыю.
Акрамя гэтага, трэба будзе падаваць шэраг зьвестак пра сябе і сваякоў. Так, спатрэбіцца інфармацыя пра сфэры занятасьці і тое, ці не прэтэндаваў канкрэтны грамадзянін на выбарчую пасаду, ці ня мае цяпер ці ў мінулым статусу дзяржаўнага ці муніцыпальнага службоўцы. Таксама трэба падаваць інфармацыю пра службу ва ўзброеных сілах, спэцслужбах, памежнай ахове, мытні, установах унутраных спраў, юрыдычных або замежных (уключаючы дыпляматычныя) ведамствах.
За ненаданьне зьвестак ці наданьне ілжывай інфармацыі пагражае штраф да 2000 эўра.
Пропуск у прымежную зону грамадзянам трэціх краін, пачынаючы з 15-гадовага ўзросту, будуць выдаваць толькі пры згодзе Службы дзяржаўнай бясьпекі Латвіі (СДБ). Прадугледжана, што ўжо выдадзеныя і дзейныя часовыя пропускі застануцца ў сіле ня больш як два месяцы з моманту набыцьця сілы паправак у закон.
Папраўкі, якія агаворваюць умовы допуску ў прымежную зону, набудуць сілу з моманту абвяшчэньня і будуць дзейнічаць да канца 2027 году. Папраўкі да Іміграцыйнага закону, якія ўводзяць для грамадзян трэціх краін патрабаваньне падаваць інфармацыю пра сябе і мэту візыту, набудуць сілу 1 верасьня 2025 года.
Папраўкі ўнесла парлямэнцкая Камісія ў нацыянальнай бясьпецы, падкрэсьліўшы, што Беларусь і Расея не адмовяцца ад выкарыстаньня грамадзян дружалюбных ім краін для выведкі і іншых шкодных дзеяньняў, накіраваных супраць Эўразьвязу і краін-сябраў NATO.
Пад дзеяньне законаў падпадуць грамадзяне ўсіх краін, выключаючы дзяржавы-сябры ЭЗ, NATO, Арганізацыі эканамічнага супрацоўніцтва і разьвіцьця (OECD), Эўрапейскай эканамічнай зоны, Швайцарыі і Бразыліі. Гэта значыць, гаворка ідзе ў першую чаргу пра грамадзян Беларусі, Расеі і краін СНД.
Адкрытым застаецца пытаньне, як ва ўмовах свабоднага перамяшчэньня ўнутры ЭЗ і Шэнгенскай зоны будуць праводзіць такі кантроль. Калі грамадзяне трэціх краін перасякаюць сухапутныя межы Латвіі з Расеяй ці Беларусьсю, гэта магчыма, аднак межы Латвіі з Літвой і Эстоніяй — адкрытыя, і тэарэтычна грамадзяне трэціх краін, могуць ажыцьцявіць падарожжа, напрыклад, са згаданай Вугоршчыны праз Польшчу ў Літву і далей у Латвію.
Зьмены прадугледжваюць, што дзяржаўныя службы бясьпекі Латвіі не радзей за раз у год будуць ацэньваць неабходнасьць гэтага патрабаваньня, яго ўплыў і далейшую мэтазгоднасьць, а потым прадставяць справаздачу ў Саэйма. Зьмены ня будуць распаўсюджвацца на асобаў з дыпляматычным імунітэтам і на тых, хто робіць кароткатэрміновую паездку для выкананьня афіцыйных функцыяў ці забесьпячэньня тэхнічнай падтрымкі.
Форум