У Славеніі грамадзянам Беларусі пачалі выдаваць часовыя дазволы на жыхарства (ДНЖ) безь неабходнасьці падаваць даведку аб несудзімасьці, паведаміла прадстаўніца Народнай амбасады Беларусі ў Славеніі Аляксандра Мамаева. Таксама яна распавяла пра шэраг іншых выпадкаў, калі беларусам ішлі насустрач пры немагчымасьці падаць пэўныя дакумэнты.
Так, паводле Аляксандры Мамаевай, прадстаўнікі Народнай амбасады даведаліся пра першы вядомы выпадак, калі дзяржаўныя органы Славеніі не патрабавалі ад беларусаў апастылі празь немагчымасьць яго атрымаць.
Афіцыйная пазыцыя Міністэрства ўнутраных спраў Славеніі рэкамэндуе не патрабаваць ад беларусаў даведак аб несудзімасьці і шлюбе, а замяняць іх старымі даведкамі і заявай аб немагчымасьці атрымаць гэтыя дакумэнты бясьпечным шляхам, адзначыла Мамаева.
Таксама прадстаўнікам Народнай амбасады Беларусі ў Славеніі стала вядома пра выдачу трэцяга пашпарта замежніка беларусу ў Славеніі. Яшчэ адна добрая навіна, паводле Мамаевай, — тое, што сваякам беларускіх актывістаў у Славеніі выдаюць доўгатэрміновыя шэнгенскія візы.
Гэтыя зьмены адбыліся дзякуючы намаганьням грамадзянскай супольнасьці і дэмакратычных сілаў Беларусі, якія актыўна супрацоўнічаюць з Народнай Амбасадай, адзначыла Аляксандра Мамаева.
У верасьні 2023 году Аляксандар Лукашэнка выдаў указ, які здымае з консульстваў за мяжой вялікі шэраг абавязкаў. Так, новы ўказ зьняў з консульстваў функцыю выдачы беларусам новых пашпартоў, тэрмін дзеяньня якіх скончыўся. Цяпер пашпарт мае права выдаваць толькі орган МУС па месцы рэгістрацыі, у Беларусі. Гэта стварыла праблемы для беларусаў за мяжой, у якіх скончыліся тэрміны дзеяньня пашпартоў. Шэраг краін ЭЗ, ідучы ім насустрач, пачалі выдаваць так званыя пашпарты замежніка.
Даверанасьць на распараджэньне сваёй маёмасьцю на радзіме (напрыклад, каб прадаць у Беларусі машыну, кватэру ці іншую маёмасьць) цяпр таксама нельга атрымаць у консульствах за мяжой. Апастыль на дакумэнты, паводле новага ўказу, таксама трэба рабіць у Беларусі.
Раней консульствы за мяжой мелі магчымасьць выдаваць шэраг дакумэнтаў: даведкі аб шлюбе ці аб скасаваньні шлюбу, аб рэгістрацыі аўтамабіля, дакумэнты аб адукацыі. Цяпер усё гэта трэба рабіць асабіста ў Беларусі ці па даверанасьці, аформленай у Беларусі.
Форум