Аб гэтым на сустрэчы з працаўнікамі лякаматыўнага дэпо Баранавічаў заявіў міністар інфармацыі Марат Маркаў, паведамляе газэта «СБ. Беларусь сегодня».
Паводле яго, толькі за студзень сёлета быў абмежаваны доступ да амаль 2,2 тысячы рэсурсаў.
«У Беларусі каля 7 тысяч інфармацыйных матэрыялаў абвешчаныя „экстрэмісцкімі“, да іх забаронены доступ, — сказаў ён. — Пры гэтым толькі за 2024 год „экстрэмісцкімі“ былі прызнаныя каля трох тысяч матэрыялаў. Акрамя таго, да 15 150 інтэрнэт-рэсурсаў, якія супярэчаць інтарэсам дзяржавы, абмежаваны доступ. І гэтая колькасьць увесь час расьце. Толькі за студзень падчас перадвыбарнай кампаніі мы былі вымушаныя абмежаваць доступ да амаль 2,2 тысячы такіх рэсурсаў».
«Гэта не гаворыць аб тым, што міністэрства інфармацыі такое злое і ўсё забараняе. Гэта сьведчыць аб тым, што ў стварэньне такіх рэсурсаў укладаюцца дзясяткі мільёнаў даляраў для таго, каб яны працавалі на развал нашай дзяржавы. Гэта значыць, мы ўвесь час знаходзімся ў стане інфармацыйнага супрацьборства», — заявіў Марат Маркаў.
Як рэжым Лукашэнкі выкарыстоўвае ярлык «экстрэмізму», каб душыць свабоду слова і змагацца з палітычнымі апанэнтамі
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».
Форум