Лічбы высьветліў Беларускі расьсьледніцкі цэнтар пасьля вывучэньня архіўных зьвестак і дзяржаўнай базы дадзеных банку вакансій.
Агулам на адным зь вядучых заводаў Беларусі — каля 13% вакансій. На 20 чэрвеня на запыт «ААТ „МТЗ“» налічвалася 1994 вакансіі, самую раньнюю зь іх апублікавалі 5 чэрвеня. Год таму на прадпрыемстве было 693 вакансіі.
Патрэба ў кадрах на заводзе пачала расьці ў канцы вясны мінулага году. За пару месяцаў прадпрыемства адкрыла больш за 300 вакансій. А з чэрвеня па сьнежань мінулага году — яшчэ амаль 900.
У 2021 годзе на МТЗ працавалі каля 15 400 чалавек, цяпер каля 13% ад гэтай колькасьць завод шукае, каб наняць на працу. У кадравай службе заводу, зрэшты, адказалі, што неўзабаве перагледзяць колькасьць вакансій і вытворчасьць.
МТЗ сёлета падпісаў болей за 70 дамоваў зь дзяржавай. Колькасьць дзяржаўных кантрактаў прадпрыемства апошнім часам рэзка вырасла.
У 2022 годзе завод выйграў 170 тэндэраў на агульную суму 46 млн беларускіх рублёў. Годам раней прадпрыемства атрымала 90 кантрактаў, а раней — ня больш за 30 на год.
