Бразылія шукае шляхі паставак беларускіх калійных угнаеньняў. Аб гэтым піша Bloomberg. Пастаўкі ўскладняюцца сэктаральнымі санкцыямі Эўрапейскага Зьвязу, а таксама абмежаваньнямі, уведзенымі ЗША ў дачыненьні «Беларуськалію» і «Беларускай калійнай кампаніі», што прывяло да блякаваньня традыцыйнага экспартнага маршруту праз порт Клайпеды. Таксама закупкі ўскладняюцца санкцыямі ў адносінах беларускага і расейскага фінансавых сэктараў.
Бразыльскія імпартэры гатовыя разглядаць варыянты бартэру, выкарыстаньне ў разьліках юаня і пасярэднікаў. Трэба адзначыць, што нядаўна ў Беларусі сваім указам Лукашэнка ўвёў ліцэнзаваньне экспарту ўгнаеньняў. Ліцэнзіі змогуць атрымліваць кампаніі па ўзгадненьні зь «Беларуськаліем».
Дакумэнт стварае магчымасьці для зьяўленьня пасярэднікаў, празь якіх могуць забясьпечвацца пастаўкі за мяжу. Да гэтага ў пачатку сакавіка быў выдадзены яшчэ адзін указ аб экспарце калійных угнаеньняў, амаль увесь ягоны зьмест засакрэчаны. Акрамя таго, на чале БКК паставілі Аляксея Скрагу, які да гэтага быў гендырэктарам «Белспэцзьнештэхнікі», — дзяржпрадпрыемства, якое займаецца экспартам узбраеньняў. Аляксандар Лукашэнка, прызначаючы яго, параўнаў гандаль угнаеньнямі ў сучасных умовах з гандлем зброяй.
Bloomberg прыводзіць думку аналітыка CRU Group Гамфры Найта, які лічыць, што Беларусь можа прадаваць частку ўгнаеньняў у Расеі, што, у сваю чаргу, дазволіць расейскім кампаніям прадаваць іх у трэція краіны. Паводле інфармацыі агенцтва, ідзе фрахт суднаў для перавозак угнаеньняў у Бразылію, але аб’ёмы невялікія. Трэба адзначыць, што РФ таксама абмежавала экспарт угнаеньняў, акрамя таго, марскія лініі адмаўляюцца працаваць з расейскімі пастаўшчыкамі.
Па дадзеных выданьня, Бразылія пакрывае за кошт імпарту 85% патрэб ва ўгнаеньнях, а ў каліі і азоце — на 90%. Пры гэтым доля Беларусі і Расеі складае 28%.
Белстат зь сярэдзіны 2021 году перастаў публікаваць зьвесткі аб экспарце ўгнаеньняў. Аднак паводле вынікаў 2020 году менавіта Бразылія была найбуйнейшым пакупніком калійных угнаеньняў. За год у краіну паставілі прадукцыі на 522 млн даляраў, адзначае reform.news.
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.
