Вынікі дасьледаваньня, якім кіравалі доктар палітычных навук Андрэй Казакевіч і доктар сацыялягічных навук Андрэй Вардамацкі, публікуе «Наша Ніва».
Дасьледаваньне распрацавана інстытутам «Палітычная сфэра» ў супрацоўніцтве зь Беларускай аналітычнай майстэрняй Андрэя Вардамацкага ў сакавіку-красавіку сёлета. Рэпрэзэнтацыйная выбарка — 1075 чалавек. Пакуль прыводзяцца асноўныя тэзісы, падрабязны аналіз плянуюць выкласьці ў асобнай публікацыі.
Сувэрэнітэт
На пытаньне, ці гатовыя вы «захаваць сувэрэнітэт Беларусі нават цаной зьніжэньня ўзроўню жыцьця», станоўча адказалі 24,9% рэспандэнтаў. Такім чынам, для чвэрці насельніцтва сувэрэнітэт — безумоўная палітычная каштоўнасьць, вышэйшая за бягучыя матэрыяльныя патрэбы. За захаваньне ўзроўню жыцьця грамадзян цаной частковай адмовы ад сувэрэнітэту выказаліся 51,6% рэспандэнтаў. Каля 23% не змаглі адказаць на гэтае пытаньне.
Прыярытэты
Сярод іншых прыярытэтаў захаваньне сувэрэнітэту і незалежнасьці трапіла толькі на чацьвёртае месца, саступіўшы «экспарту і пошуку рынкаў збыту для беларускіх тавараў» (36%), «зьніжэньню магчымасьці войнаў і збройных канфліктаў» (32,1%), «прыцягненьню замежных інвэстыцый і тэхналёгій» (29,9%).
Пагрозы
На пытаньне, ці існуе пагроза для захаваньня сувэрэнітэту і незалежнасьці з боку іншых дзяржаў, «так» ці «хутчэй так» адказалі больш за палову рэспандэнтаў — 50,8%. Пры гэтым значна больш удзельнікаў адчуваюць пагрозу «эканамічным інтарэсам» («так» ці «хутчэй так» — 65%) і пагрозу «пашырэньня міжнароднай злачыннасьці, гандлю наркотыкамі і іншых неваенных пагрозаў» (58,8%). Пры гэтым вонкавую пагрозу захаваньню нацыянальнай ідэнтычнасьці і культуры бачаць 30,9% рэспандэнтаў.
Расея
«Што Беларусь павінна рабіць, калі яе інтарэсы супярэчаць інтарэсам Расеі?» Адказы наступныя. Адстойваць выключна ўласныя інтарэсы — 27,9%. Шукаць кампраміс па другасных пытаньнях, але адстойваць выключна свае інтарэсы ў ключавых пытаньнях — 51,6%. Шукаць кампраміс, ахвяруючы часткай інтарэсаў у другасных і ключавых пытаньнях — 10,4%, а цалкам улічваць інтарэсы Расеі — менш за 2%. Такім чынам, беларусы збольшага гатовыя да супярэчнасьцяў у стасунках з суседкай.
Высновы
Паводле дасьледаваньня, прыблізна для 25–28% беларускага насельніцтва сувэрэнітэт і нацыянальная незалежнасьць зьяўляюцца безумоўнай каштоўнасьцю. Людзей, якія ня бачаць у сувэрэнітэце асаблівай каштоўнасьці, 12–19%.
Паміж гэтымі групамі пралягае шырокая пераходная зона тых, для каго сувэрэнітэт мае прыкметнае, але не безумоўнае значэньне. Умоўна яна таксама падзяляецца на дзьве часткі. Да 20% гатовыя ахвяраваць часткай сувэрэнітэту, але толькі ў выключных выпадках, зьвязаных са значным зьніжэньнем узроўню жыцьця. Да 30% гатовыя ахвяраваць часткаю сувэрэнітэту толькі ў выніку доўгатэрміновых эканамічных выгад.
Бягучы палітычны крызіс, супрацьстаяньне дзейнай улады і альтэрнатыўных палітычных сілаў выключаюць з поля сваёй увагі пытаньні дзяржаўнасьці і нацыянальнай кансалідацыі, як і бачаньне разьвіцьця краіны ў прынцыпе. Але да гэтых праблемаў давядзецца вярнуцца незалежна ад таго, які будзе вынік прэзыдэнцкай кампаніі, падсумоўваюць аўтары дасьледаваньня.
