18 лістапада Аляксандр Лукашэнка правёў нараду, на якой разам з чыноўнікамі абмеркаваў праграму разьвіцьця Палесься, разьлічаную на пэрыяд да 2030 году. Вядома, што кіраваць праграмай будзе Міхаіл Русы — прадстаўнік Лукашэнкі ў Берасьцейскай вобласьці.
Як піша БелТА, сярод іншага Лукашэнка зьвярнуў увагу на водныя рэсурсы галоўнай воднай артэрыі Палесься, ракі Прыпяць, якая ўпадае ў Дняпро, а той далей нясе свае воды праз Украіну ў Чорнае мора.
«Куды адыходзяць гэтыя воды? Добра б Украіна карысталася спаўна дняпроўскімі водамі... У мора адыходзяць гэтыя воды. Дык чаму ж мы сёньня не думаем аб тым, што гэту ваду трэба „павярнуць назад“ тады, калі трэба, і туды, куды трэба», — сказаў Лукашэнка на нарадзе.
Паводле Лукашэнкі раней кіраўніцтва Гомельскай вобласьці прапаноўвала яму вярнуцца да тэмы Днепра-Бугскіх каналаў і ён даручаў старшыні Гомельскага аблвыканкама Івану Крупко ўнесьці прапанову.
«Ён мне як унёс прапанову — у мяне ў вачах пацямнела. Таму што такіх вялікіх грошай у нас проста няма», — сказаў Аляксандр Лукашэнка.
Паводле БелТА, у выніку Лукашэнка сказаў, што наконт гэтай ідэі трэба яшчэ параіцца з дасьведчанымі людзьмі.
- Сыстэма каналаў на тэрыторыі Палесься зьвязвае Дняпро з ракой Віслай, якая ўпадае ў Балтыйскае мора. Паводле праекту аднаўленьня гэтага воднага шляху пад назвай Е-40, які фінансава падтрымліваў Эўразьвяз, па ім можна штогод перавозіць да 6 мільёнаў тон грузаў, аднак праз вайну ва Ўкраіне і разрыў эканамічных сувязяў паміж Беларусьсю і Польшчай рэалізацыя праекта замарозілася.
- Праект павароту сібірскіх рэк на поўдзень у пачатку 1980-х гадоў спрабавала рэалізаваць кіраўніцтва Савецкага Саюзу, якое спасылалася на патрэбы ў водных рэсурсах для сельскай гаспадаркі рэспублік Цэнтральнай Азіі.
- Праект патрабаваў надзвычайных фінансавых укладаньняў, якімі краіна ўжо не валодала, а таксама пагражаў катастрафічнымі наступствамі для прыроды Сібіры, між тым улады пачалі яго рэалізоўваць. Змарнаваўшы велізарныя сродкі праект канчаткова спынілі з прыходам да ўлады ў СССР Міхаіла Гарбачова.
- Выраз «паварот сібірскіх рэк» стаў прыкладам валюнтарызму і марнатраўства савецкай улады.
Форум