Антон Рудак: «Кніга Бахарэвіча замацуе цікавасьць маладых да яго папярэднікаў»

Палічка кніжнай сэрыі «Бібліятэка Свабоды. XXI стагодзьдзе» папоўнілася новым выданьнем. Яго склалі літаратурныя эсэ Альгерда Бахарэвіча, якія сёлета гучалі ў эфіры і друкаваліся на нашым сайце. 15 лістапада кніга «Гамбурскі рахунак Бахарэвіча» будзе прэзэнтаваццца а 19.00 у памяшканьні менскага Інстытуту Гётэ (вул. Веры Харужай, 25/3, трэці паверх). А сваімі першымі чытацкімі ўражаньнямі пра новае свабодаўскае выданьне дзеліцца малады паэт Антон Рудак.

«Гаворачы пра „Гамбурскі рахунак Бахарэвіча“, нельга не адзначыць правакатыўнасьць гэтага цыклю эсэ. Але тут паўстае пытаньне: ці гэтая правакацыя таленавітая, ці дарэчная, ці мае яна плён?

Паводле маіх назіраньняў сярод моладзі, нават якая ня надта цікавілася літаратурай, тым больш літаратурай дваццатага стагодзьдзя, савецкай і дасавецкай, пасьля прачытаньня гэтых тэкстаў, ці прынамсі, часткі зь іх, ці, можа, там двух ці аднаго, у іх пачынаецца гэтая зацікаўленасьць менавіта першакрыніцамі. Маладыя людзі, якія вучацца далёка не на гуманітарных спэцыяльнасьцях і ня маюць ніякага дачыненьня да літаратуры, пачынаюць перачытваць творы беларускіх пісьменьнікаў дваццатага стагодзьдзя, дзевятнаццатага стагодзьдзя.

І гэтую кнігу, мне здаецца, варта ўспрымаць ня толькі як такі ўнікальны навучальны дапаможнік па беларускай літаратуры, але і ў кантэксьце творчасьці Бахарэвіча наагул. І калі з „Шабанамі“, папярэдняй кнігай, ён здолеў прывабіць да сучаснай літаратуры частку моладзі, якая раней літаратурай не цікавілася ўвогуле, то „Гамбурскі рахунак“, на маю думку, толькі замацуе гэтую зацікаўленасьць і акцэнтуе яе менавіта на папярэдніках сучасных літаратараў, папярэдніках Бахарэвіча».






Прэзэнтацыя кнігі "Гамбурскі рахунак Бахарэвіча"адбудзецца 15 лістапада а 19.00 у памяшканьні менскага Інстытуту Гётэ (вул. Веры Харужай, 25/3, трэці паверх).