د پاکستان کابينې د جنورۍ پر ۲۸مه نېټه د سټيزن پروټېکشن رولز ۲۰۲۰ م منظوري ورکړې وه. په پاکستان او نړۍ کې د بشري او انټرنيټي حقونو سازمانونو دغه رولز رد کړل او وې ويل چې ددې له مخې به په دې هېواد کې د وينا ازادي وځپل شي.د جنوبي او منځنۍ اسيا لپاره د امريکا مرستيالې وزيرې اېلس وېلز هم د سېشنبې پر ورځ پر دې حکومتي اقدام تنقيد وکړ او دا يې په پاکستان کې د اظهار ازادۍ او د ټيکنالوجۍ په برخه کې اقتصادي پرمختګ ته زيان رسونکي وبللی. دا قواعد و ضوابط د ټولنيزو رسنيو له نړيوالو ادارو څه غوښتنې کوي او ددې به په پاکستان کې د وينا پر ازادۍ څه اغېز وي؟ دا او نورې پوښتنې په لندن کې مېشت د ټولنيزو رسنيو او سياسي فعاليت پر موضوع تحقيق کوونکي ضياوالله همدرد او په اسلام اباد کې استاد حسن توري سره څېړل شوې دي. حسن توري د ټولنيزو رسنيو د يوه کارونکي په توګه خپل نظر ورکړی دی.
د مشال تر رڼا لاندې
چار شنبه ۲۶ فبروري ۲۰۲۰
د فبرورۍ پر ۱۸مه نېټه په پېښور کې د عوامي نېشنل ګوند تر سیورې لاندې شوې غونډه کې ګڼو سياسي ګوندونو د پخوانی فاټا په خيبرپښتونخوا کې د ضم کولو د بهير پر ورووالي نيوکې وکړې. په غونډه کې د ضم کېدو بهير تېزولو په لړ کې ۳۱ نکتې په ګوته کړل شوې. د قبايلي ضلعو په خيبريښتونخوا کې د ورګډولو بهير د خلکو ژوند له کومو ستونزو سره مخامخ کړی دی؟ دا او نورې پوښتنې د مشال تر رڼا لاندې بحث کې په خيبرپښتونخوا اسمبلۍ کې له مومندو د عوامي نېشنل ګوند استازي نثار مومند، په قامي اسمبلۍ کې له خيبره د تحريک انصاف غړی اقبال اپريدي، له شمالي وزيرستان سره تړاو لرونکی خبريال رسول داوړ او د مشال راډیو خبريال غلام غوث سره څېړل شوې دي
