Դոնալդ Թրամփն ու Վլադիմիր Պուտինը պայմանավորվել են իրենց օգնականներին հանձնարարել անհապաղ սկսել երկու երկրների ղեկավարների հանդիպման նախապատրաստությունը, այսօր հայտնել է Կրեմլի խոսնակ Դմիտրի Պոսկովը:
«Պետությունների ղեկավարները հեռախոսազրույցի ընթացքում պայմանավորվել են, որ իրենք կշարունակեն շփումները, կկենտրոնանան առանձին հանդիպման վրա, ինչպես նաև պայմանավորվեցին, որ օգնականներին անհապաղ հանձնարարականներ կտրվեն, որպեսզի նրանք սկսեն համապատասխան աշխատանքը», - նշել է Պեսկովը:
Երեկ Միացյալ Նահանգների նախագահը իր ռուս և ուկրաինացի պաշտոնակիցների հետ հեռախոսազրույցներից հետո հայտարարեց, որ Վլադիմիր Պուտինի հետ պայմանավորվել են բանակցություններ սկսել, որպեսզի վերջ դնեն Ուկրաինայում ընթացող պատերազմին:
«Կարծում եմ՝ մենք խաղաղություն ձեռք բերելու ճանապարհին ենք: Կարծում եմ՝ նախագահ Պուտինը խաղաղություն է ցանկանում, նախագահ Զելենսկին ևս խաղաղություն է ցանկանում։ Ես նույնպես խաղաղություն եմ ուզում: Պարզապես ցանկանում եմ, որ վերջ դրվի մարդկանց սպանդին: Մարդիկ իրականում չգիտեին, թե ինչ է մտածում նախագահ Պուտինը։ Բայց կարող եմ մեծ վստահությամբ ասել, որ նա ևս ցանկանում է, որ դա ավարտվի: Եվ դա լավ է», - ասել է Թրամփը:
ԱՄՆ նախագահը նշել է՝ ամեն ինչ կանեն, որ պատերազմն ավարտվի և հնարավորինս շուտ, բայց կոնկրետ ժամկետներ ու ուղիներ չնշեց: Ըստ նրա՝ Պուտինի հետ հիմնականում հեռախոսազրույցներով կշփվեն, իսկ առաջին հանդիպումը հավանաբար տեղի կունենա Սաուդյան Արաբիայում:
«Մենք, ի վերջո, ակնկալում ենք հանդիպել: Փաստացի, ակնկալում ենք, որ նա կգա այստեղ, ես կգնամ այնտեղ: Առաջին անգամ, հավանաբար, կհանդիպենք Սաուդյան Արաբիայում, որպեսզի հասկանանք, թե արդյոք կարող ենք ինչ-որ բան անել: Բայց ուզում ենք վերջ տալ այս պատերազմին։ Այս պատերազմը աղետ է։ Իսկապես արյունալի, սարսափելի պատերազմ է», - ընդգծել է նա:
Չնայած Թրամփի հետ հեռախոսազրույցից հետո երեկվա լավատեսական տրամադրություններին՝ Զելենսկին այսօր հայտարարել է, որ Ուկրաինան չի համաձայնի երկկողմ համաձայնությունների, որոնք Մոսկվայի և Վաշինգտոնի միջև ձեռք կբերվեն առանց Կիևի մասնակցության։ Նա Եվրոպային կոչ է արել նստել բանակցությունների սեղանի շուրջ, ապա հավելել, թե կարևոր է, որ ամեն ինչ չընթանա Պուտինի պլանի համաձայն, որը ցանկանում է ամեն ինչ անել, որպեսզի բանակցություններն ընթանան միայն Մոսկվայի և Վաշինգտոնի միջև:
Եվրոպական երկրները հայտարարում են՝ իրենք ևս պետք է մասնակցեն Ուկրաինայի հարցով բանակցություններին
Այսօր ավելի վաղ եվրոպական յոթ երկրներ, այդ թվում՝ Ֆրանսիան, Գերմանիան և Մեծ Բրիտանիան, ինչպես նաև Եվրոպական հանձնաժողովը հայտարարել են, որ իրենք ևս պետք է մասնակցեն ուկրաինական պատերազմն ավարտելու շուրջ ապագա բանակցություններին:
«Մեր ընդհանուր նպատակը պետք է լինի այն, որ Ուկրաինան կարողանա ուժի դիրքերից խոսել: Ուկրաինան և Եվրոպան պետք է լինեն ցանկացած բանակցությունների մաս: Ուկրաինան պետք է ապահովվի անվտանգության երաշխիքներով: Ուկրաինայում արդար և տևական խաղաղությունը կայուն անդրատլանտյան անվտանգության նախապայմանն է», - նշված է հայտարարությունում:
Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասն այսօր իր հերթին հայտարարեց, որ Եվրոպան կաջակցի Ուկրաինային, եթե այն դեմ լինի ԱՄՆ-ի բանակցած խաղաղության համաձայնագրին: Եվրոպայի թիկունքում ցանկացած գործարք չի աշխատի, քանզի ցանկացած համաձայնագրի շուրջ բանակցություններին պետք է մասնակցեն թե՛ Ուկրաինան, թե՛ Եվրոպան, ասաց եվրոպացի պաշտոնյան:
«Առանց մեզ բանակցությունների սեղանի շուրջ կարող եք պայմանավորվել ինչի շուրջ որ ցանկանաք, սակայն դա պարզապես կձախողվի, քանզի դրա իրականացումը հնարավոր չէ: Ցանկացած արագ լուծում կեղտոտ գործարք է, ինչպես տեսել ենք նախկինում [...], և այն պարզապես չի աշխատի [...]: Եթե Ուկրաինան որոշի դիմադրել, Եվրոպան կաջակցի Ուկրաինային», - հայտարարեց Կալլասը:
Ուկրաինայի Գերագույն Ռադայի պատգամավոր Ալեքսանդր Մերեժկոն «Ազատություն» ռադիոկայանի ուկրաինական ծառայությանն ասել է, թե միայն այն, որ Թրամփը նախ խոսել է Պուտինի հետ, արդեն Ուկրաինայի օգտին չէ: Ըստ նրա՝ ճիշտ կլիներ, եթե սկզբում խոսեր Զելենսկու հետ:
«Դա տրամաբանական կլիներ, քանի որ Ուկրաինան է ագրեսիայի զոհը։ Վստահ եմ, որ Ուկրաինայի նախագահի հետ խոսելուց հետո Կրեմլի բռնապետի հետ զրույցն այլ կերպ կլիներ։ Եվ այստեղ հարկ է նշել, որ, ցավոք, միայն այս խոսակցության փաստը ձեռնտու չէ Ուկրաինային», - ընդգծել է Մերեժկոն:
ԱՄՆ պաշտպանության նախարար Փիթ Հեգսեթն այսօր հերքել է պնդումները, թե Վաշինգտոնը դավաճանում է Ուկրաինային՝ նշելով, որ Միացյալ Նահանգները մնում է Կիևի ամենամեծ ֆինանսական աջակիցը և առայսօր 300 միլիարդ դոլար է հատկացրել Ուկրաինայում առաջնագծի կայունացման համար: Նրա խոսքով՝ ողջ աշխարհը, ներառյալ Միացյալ Նահանգները, շահագրգռված է, որ խաղաղություն հաստատվի:
ԱՄՆ Պետդեպարտամենտը տեղեկացնում է, որ Ուկրաինայի և Ռուսաստանի հարցերով Թրամփի հատուկ բանագնաց Քիթ Քելլոգն առաջիկայում Գերմանիայում կմասնակցի Մյունխենի անվտանգության համաժողովին, ապա կայցելի ՆԱՏՕ-ի ու ԵՄ կենտրոնակայան, որտեղ կհանդիպի դաշնակիցների ու գործընկերների հետ ողջ Եվրոպայից, որոնք պատրաստ են աշխատել Միացյալ Նահանգների հետ՝ վերջ դնելու Ուկրաինայում հակամարտությանը և վերականգնելու կայունությունը Եվրոպայում։
Ի դեպ, նույն ճեպազրույցի ժամանակ Դոնալդ Թրամփը, պատասխանելով ՆԱՏՕ-ին Ուկրաինայի հնարավոր անդամակցության մասին հարցին, ասել է, որ դա ռեալ չի համարում: Նաև նշել է, որ Ռուսաստանը երկար ժամանակ է ասում է, որ Ուկրաինան չի կարող անդամակցել Հյուսիսատլանտյան դաշինքին, ինչը ԱՄՆ նախագահը նորմալ է համարում:
