Մոսկվան չի կարող չանհանգստանալ խաղաղության պայմանագրի տեքստի վերջնականացման վերաբերյալ դրական լուրերի ֆոնին հայ-ադրբեջանական սահմանին լարվածության աճի մասին լուրերից, ճեպազրույցի ժամանակ հայտարարել է Ռուսաստանի արտգործնախարարության պաշտոնական ներկայացուցիչ Մարիա Զախարովան։
«Մենք խստորեն կոչ ենք անում մեր գործընկերներին՝ զսպվածություն ցուցաբերել և խուսափել իրավիճակը սրող ցանկացած գործողություններից», - ասել է Զախարովան՝ շեշտելով՝ բոլոր խնդիրները պետք է լուծվեն բացառապես խաղաղ, դիվանագիտական ճանապարհով։
Վերջին 5 օրվա ընթացքում Բաքուն 12 հաղորդագրություն է տարածել՝ հայկական կողմին մեղադրելով իր դիրքերին կրակելու համար: Հայկական կողմը հերքել է բոլոր մեղադրանքները՝ շեշտելով՝ իրադրությունն էսկալացնելու խնդիր և նպատակ չունի և շարունակում է գործել խաղաղության օրակարգի սկզբունքներով՝ Բաքվին կոչ անելով խորհրդակցություններ սկսել հայ - ադրբեջանական խաղաղության համաձայնագրի ստորագրման տեղի և ժամկետների վերաբերյալ։ Վարչապետ Նիկոլ Փաշինյանն էլ հայտարարել է՝ անձամբ է հստակ հանձնարարել Պաշտպանության նախարարությանը՝ հրադադարի ռեժիմի ոչ մի խախտում չանել։
ՀԱՊԿ պարտավորություններից
Լրագրողի հարցին, թե ՀԱՊԿ-ին Երևանի անդամակցության սառեցման ֆոնին Հայաստանի անվտանգությունն ապահովելու Ռուսաստանի պարտավորությունները մնո՞ւմ են ուժի մեջ, Զախարովան պատասխանել է․ - «Ինչ վերաբերում է ՀԱՊԿ շրջանակներում և երկկողմ ձևաչափով Հայաստանի հանդեպ Ռուսաստանի պարտավորություններին, ապա բազմիցս ասվել է, որ դրանք բոլորն ուժի մեջ են»։
Միևնույն ժամանակ Ռուսաստանի արտգործնախարարության պաշտոնական ներկայացուցիչը շեշտել է՝ ՀԱՊԿ-ին Երևանի անդամակցության «սառեցումը» չի նպաստում Հայաստանի անվտանգության ամրապնդմանը։
Հայաստանը ավելի վաղ հայտարարել է, որ սառեցնում է իր մասնակցությունը ՀԱՊԿ-ի միջոցառումներին, հրաժարվել է նաև բաժին ֆինանսավորումը հատկացնել այդ կառույցին, տևական ժամանակ չի մասնակցում համատեղ զորավարժություններին, հանդիպումներին, բայց պաշտոնապես չի դիմել ՀԱՊԿ-ից դուրս գալու գործընթաց սկսելու համար։ 2024-ին վարչապետ Փաշինյանը հայտարարեց, որ Երևանի անդամակցությունը դաշինքին դե ֆակտո սառեցված է, հնարավոր է՝ սառեցվի նաև դե յուրե, եթե դաշնակիցները չփոխեն իրենց դիրքորոշումը։
Երևանը խստորեն քննադատում է ՀԱՊԿ-ին հատկապես 2022 թվականին Հայաստանի ինքնիշխան տարածք ադրբեջանական ուժերի ներխուժումից հետո, երբ այդ կառույցը ոչ միայն չպաշտպանեց իր անդամին, այլև նույնիսկ պատշաճ չարձագանքեց Ադրբեջանի ագրեսիային։
