«Հանգիստ ա, ոնց որ ձմեռվանից սկսել ա տենց հանգիստ, մինչև հիմա նույնն ա, տենց»․ - Գեղարքունիքի մարզի սահմանամերձ Վերին Շորժա բնակավայրի ղեկավար Արտեմ Երանոսյանը վերջին օրերին մեկ կրակոցի ձայն անգամ չի լսել։ Իրենք ադրբեջանական դիրքերին շատ մոտ են, ասում է` ոչ հայկական, ոչ էլ ադրբեջանական դիրքերից չեն կրակել։
«Չէ, մեր մոտից նման բան չի եղել, ես նման բան չեմ տեսել։ Ես կափպված եմ տղերքի հետ, շատ շփման մեջ են իրանց հետ՝ զինվորականների հետ, մենք, ես տենց բան չեմ տեսել էդ կողմից», - «Ազատության» հետ զրույցում ասաց Երանոսյանը։
Հայաստանի պաշտպանության նախարարությունը վերջին հինգ օրվա ընթացքում 11 հաղորդագրությամբ է հերքել Բաքվի պնդումները, թե հայկական կողմը կրակ է բացել ադրբեջանական դիրքերի ուղղությամբ։ Բաքվից կոնկրետ ուղղություն էլ են նշել՝ արևելյան ու հարավարևելյան հատվածից, այսինքն՝ Գեղարքունիքի ու Սյունիքի կողմերից։
«Չէ, չէ, չեմ լսել», - ասաց Վերին Շորժայի համայնքապետը։
Հայկական ու ադրբեջանական դիրքերն այնքան մոտ են, որ անզեն աչքով էլ տեսանելի կլիներ շարժը, իսկ կրակոցը հնարավոր չէր չլսել, պնդում է Ներքին Շորժա բնակավայրի ղեկավար Արա Մինասյանը։
«Մեր մոտ կրակոց բացարձակ չկա՝ Ներքին Շորժայում, ոչ մի տեսակի կրակոց չկա», - «Ազատության» հետ զրույցում ասաց Մինասյանը, - «Ինչքան ժամանակ՝ ձմեռվանից առաջ կրակոցներ վաբշե չի եղել։ Չէ, մեր մոտ բացարձակ, ոչ մի տեսակի կրակոց չկա»։
Բաքվի հաղորդագրությունները սկզբում վերաբերում էին Սյունիքին, թե այստեղի ստորաբաժանումները օրվա տարբեր ժամերի կրակ են բացել ադրբեջանական դիրքերի ուղղությամբ։ Հայկական կողմը մարտի 16-ին միայն երեք հաղորդագրությամբ հերքեց այդ պնդումները։ Կրկնեց հրադադարի ռեժիմի խախտման դեպքերի կամ այդ մասին տեղեկությունների հետաքննության Հայաստան - Ադրբեջան համատեղ մեխանիզմ ստեղծելու առաջարկը։ Բաքուն Երևանի այս առաջարկին մինչ օրս չի արձագանքել։
«Ոչ, ոչ մի կրակոց, շատ հանգիստ վիճակ ա, ոնց եղել ա, նույն ձևով, ես ամենօրյա կապի մեջ եմ»․ - Գորիսի Ակներ բնակավայրից շատ քիչ են հեռու ադրբեջանական զորքերը, Սև լճի ափերին են նստած, գյուղը ներքևում է։ Բնակավայրի վարչական ղեկավար Արկադի Սիմոնյանն էլ կրակոցի ձայն չի լսել. - «Տենց բան չկա, դա ապատեղեկատվություն ա երևի։ Բացարձակ տենց բան գոյություն չունի։ Ուղիղ գծով՝ երեք կիլոմետր, ավտոմատով էլ կրակեն, անպայման կլսենք։ Հանդարտ, հանդարտ վիճակ ա»։
Մարդիկ գյուղատնտեսական աշխատանքներով են զբաղված, բնականոն ապրում են: Սահմանը ուղիղ գծով մոտ երեք կիլոմետր է հեռու, ասում է Սիմոնյանը:
Ադրբեջանի հաղորդագրություններին զուգահեռ, վարչապետ Փաշինյանը խաղաղության պայմանագիրը ստորագրելու պատրաստակամություն է հայտնել՝ Ֆեյսբուքում մի քանի գրառում անելով։ «Իմ հանձնարարականը ՀՀ պաշտպանության նախարարությանը հստակ է։ Հրադադարի ռեժիմի ոչ մի խախտում չանել։ Հայաստանը գնում է խաղաղության և ոչ թե պատերազմի», - գրել է վարչապետը։
Իշխող թիմից պատգամավոր Արսեն Թորոսյանը կրակոցների մասին Բաքվի հայտարարությունները տեղեկատվական սադրանք է որակել:
«Հայաստանի կառավարությունն ամենաբարձր մակարդակով հայտարարել է, որ իրադրությունն էսկալացնելու խնդիր և նպատակ չունի և շարունակում է գործել խաղաղության օրակարգի սկզբունքներով։ Սահմանամերձ հատվածներում Հայաստանի բոլոր քայլերը տեղավորվում են բացառապես պաշտպանական տրամաբանության մեջ», - հայտարարել են Արտաքին գործերի նախարարությունից:
