Չինաստանը վաղվանից 84 տոկոս մաքսատուրք կսահմանի ամերիկյան ապրանքների համար՝ նախկինում հայտարարված 34-ի փոխարեն: Սրանով Պեկինը պատասխանում է չինական ապրանքների համար ԱՄՆ սահմանած 104 տոկոս մաքսատուրքերին, որոնք ուժի մեջ են մտել այսօր՝ էլ ավելի սաստկացնելով Դոնալդ Թրամփի հայտարարած գլոբալ առևտրային պատերազմը:
Այս լուրի ֆոնին եվրոպական ֆինանսական շուկաները, որոնք բացասական ցուցանիշներով էին մեկնարկել առավոտյան, շարունակել են անկում գրանցել: Brent տեսակի նավթի գինն իջել է 2021-ի փետրվարից ի վեր ամենացածր մակարդակին՝ 60 դոլար մեկ բարելի դիմաց: Միայն Չինաստանի ֆոնդային շուկան է աճ գրանցել ենթադրաբար կառավարության միջամտության շնորհիվ:
ԱՄՆ ֆինանսների նախարար Սքոթ Բեսենթը Fox Business Network-ին ասել է, որ Չինաստանի այս որոշումն անհաջող և պարտվողական է:
«Ըստ իս՝ ցավալի է, որ չինացիներն իրականում չեն ցանկանում գալ և բանակցել, քանի որ նրանք միջազգային առևտրային համակարգում ամենավատ իրավախախտներն են», - նշել է Բեսենթը:
Չինաստանի հայտարարությունից րոպեներ անց նախագահ Թրամփն արտերկրում գործող ընկերություններին կոչ արեց տեղափոխվել ԱՄՆ՝ խոստանալով բիզնեսի համար նպաստավոր պայմաններ ստեղծել և մաքսատուրք առհասարակ չկիրառել:
«Սա հիանալի ժամանակ է ձեր ընկերությունն ԱՄՆ տեղափոխելու համար, ինչպես Apple-ը, և ռեկորդային թվով շատ այլ ընկերություններ են անում … Մի՛ սպասեք, եկե՛ք հիմա», - նշել է Թրամփը:
Աշխարհի խոշորագույն արտահանողի նկատմամբ ԱՄՆ-ն 104 տոկոս մաքսատուրք էր սահմանել, երբ Չինաստանը հրաժարվեց վերացնել իր պատասխան մաքսատուրքերը՝ խոստանալով պայքարել մինչև վերջ: Պեկինը Վաշինգտոնին կոչ էր արել չեղարկել մաքսատուրքերը և բանակցել։ Սակայն Թրամփը մերժել էր՝ ասելով, որ Չինաստանն իրականում ցանկանում է գործարք կնքել և ինչ-որ պահի կանի դա, պարզապես չգիտի, թե ինչպես:
Բրյուսելն իր հերթին պատասխան մաքսատուրքեր սահմանեց
ԱՄՆ-ն 25 տոկոս մաքսատուրք էր սահմանել նաև ԵՄ-ից ներկրվող պողպատի և ալյումինի նկատմամբ: Այսօր Բրյուսելն իր հերթին պատասխան մաքսատուրքեր սահմանեց: Եվրոպական հանձնաժողովի հայտարարությունում ասվում է, որ մաքսատուրքերն արդարացված չեն և վնասում են երկու կողմերին: ԵՄ-ն պատրաստ է բանակցությունների միջոցով հավասարակշռված և փոխշահավետ լուծումներ գտնել:
Չնայած երկխոսության այս առաջարկին, Ֆրանսիայի բանկի ղեկավար Ֆրանսուա Վիլերոյ դե Գալաուն հայտարարել է, որ չեն կարող փոխել ամերիկյան քաղաքականությունը, որի հետևանքով կարող է տուժել հենց ԱՄՆ տնտեսությունը:
«Նույնիսկ ենթադրություններ կան ԱՄՆ-ում հնարավոր ռեցեսիայի մասին, որը հնարավոր չէր պատկերացնել երեք ամիս առաջ: Սա պարզապես ցույց է տալիս, որ ԱՄՆ ստեղծած այս իրադրությունից առաջին հերթին տուժում է ամերիկյան տնտեսությունը», - նշել է Գալաուն:
Շարքային քաղաքացիներն իրենց հերթին դժգոհ են այս իրավիճակից: Գերմանիայի Քյոլն քաղաքի բնակիչ Ալֆրեդ Վալատն ասում է, որ ԱՄՆ-ին պետք է անտեսել, քանզի աշխարհն Ամերիկայով չի սահմանափակվում:
«Ամերիկան 340-400 միլիոն բնակիչ ունի ընդամենը, կներեք։ Չինաստանն ունի 1,2 միլիարդ բնակչություն, մի փոքր ավելի ունի Հնդկաստան։ Ընդհանուր ստացվում է 2,4 միլիարդ մարդ, ուրեմն մեր ինչի՞ն է պետք ԱՄՆ-ն», - ասել է Վալանտը:
Մարիան Շուերմանն էլ ասում է, որ ստեղծված իրավիճակին պետք է արձագանքել միայն ԱՄՆ-ի նկատմամբ պատասխան մաքսատուրքերով. - «Այսքանը պետք է ասեմ: Ուղղակի անհավատալի է, թե ինչ է անում այս մարդը բոլորիս, ողջ աշխարհի հետ»:
«Վաշինգտոնն իրեն պարտավորված չի զգում հետևելու միջազգային առևտրային իրավունքի նորմերին»
Ռուսաստանը, որի նկատմամբ Թրամփը մաքսատուրքեր չի կիրառել, հայտարարել է, որ չինական ապրանքների վրա 104 տոկոս մաքսատուրք սահմանելով՝ ԱՄՆ-ն խախտում է միջազգային առևտրի կանոնները: «Վաշինգտոնն իրեն պարտավորված չի զգում հետևելու միջազգային առևտրային իրավունքի նորմերին», - ասել է Արտգործնախարարության խոսնակ Մարիա Զախարովան։
Վերջին օրերին համաշխարհային բորսաներում արժեթղթերի արժեզրկման պատճառով մի քանի տրիլիոն դոլար է փոշիացել: Ըստ Forbes-ի՝ նոր մաքսատուրքեր սահմանելուց հետո Թրամփն ինքն է կես միլիարդ դոլար կորցրել:
ԱՄՆ նախագահն այս մաքսատուրքերով ցանկանում է նվազեցնել ապրանքների ներհոսքը և կանխել աշխատատեղերի արտահոսքը այլ երկրներ՝ ամերիկյան արտադրությունն աշխուժացնելու համար: Սակայն, ըստ տնտեսագետների, այս քաղաքականությունը մեծացնում է ռեցեսիայի վտանգն ԱՄՆ-ում և ամբողջ աշխարհում:
