ԱՄՆ նախագահ Դոնալդ Թրամփն այսօր պաշտպանել է աշխարհի ավելի քան հարյուր երկրների հանդեպ նոր՝ աննախադեպ մաքսատուրքեր սահմանելու իր որոշումը՝ զգուշացնելով ամերիկացիներին՝ «դժվար է լինելու, բայց ի վերջո այդ քայլը հանգեցնելու է չտեսնված ներդրումների և բարգավաճման»։
«Մենք հիմար ենք եղել և թույլ տվել, որ մեզ հարվածեն, բայց դա այլևս չի շարունակվի: Մենք հետ ենք բերում աշխատատեղերն ու բիզնեսները», - գրել է Թրամփը իր Truth Social հարթակում, հավելելով, - «Սա տնտեսական հեղափոխություն է, և մենք հաղթելու ենք»։
Սպիտակ տան ղեկավարն օրեր առաջ հրապարակեց նոր քաղաքականությունը, որը ի թիվս այլ երկրների, 20 տոոկս մաքսատուրքեր է սահմանում Եվրամիությունից, ավելի քան 30 տոկոս Չինաստանից ներմուծվող ապրանքների վրա։ Ֆրանսիան և Գերմանիան հայտարարել են, որ ԵՄ-ն կարող է պատասխանել՝ հարկեր սահմանելով ամերիկյան տեխնոլոգիական ընկերությունների հանդեպ:
Տնտեսագետները զգուշացնում են, որ Վաշինգտոնի այս քայլը կարող է առևտրային պատերազմ հրահրել՝ վտանգելով տնտեսական աճն ամբողջ աշխարհում։
