Як мяркуе польскае ведамства, Bynex нясе «сапраўдную рызыку выкарыстаньня яе для абыходу дзейных міжнародных санкцый, а таксама для фінансаваньня або падтрымкі дзейнасьці дзяржаўных органаў Рэспублікі Беларусь, у тым ліку ў кантэксьце падтрымкі расейскай агрэсіі супраць Украіны».
Гэтыя высновы зробленыя на падставе таго, што ўсе арганізацыі ПВТ, уключна з «ЕРПБел», «знаходзяцца пад непасрэдным кантролем беларускіх дзяржаўных органаў».
У міністэрстве ня лічаць за вынятак, што біржа і яе апэратар — гэта прыватны бізнэс. У прыватнасьці, падкантрольны вядомаму IТ-прадпрымальніку, заснавальніку SoftClub Уладзімеру Сіротку. Яго з кампаньёнамі нядаўна затрымалі ў Беларусі, іх падазраюць у вывадзе рэсурсаў зь Беларусі.
Акрамя таго, як адзначаюць у міністэрстве, з 2021 году «ЕРПБел» зьяўляецца партнэрам найбуйнейшага дзяржаўнага банку Беларусі — «Беларусбанку», які знаходзіцца пад санкцыямі. У Міністэрстве ўнутраных спраў і адміністрацыі Польшчы ўспамінаюць, што колішні галоўны рахункавод «Беларусбанку» Ірына Лысакоўская ў 2022–2023 гадах была якраз дырэктаркай «ЕРПБел».
Кампанія «ЕРПБел» створаная ў 2007 годзе, у 2008-м стала рэзыдэнткай ПВТ. Сярод яе буйных праектаў, рэалізаваных да таго моманту, як яна занялася крыптабіржай, рашэньні для Менскай цэнтральнай мытні, мытных камітэтаў Таджыкістану і Казахстану, Міністэрства фінансаў Казахстану, Менскага трактарнага заводу (МТЗ), піша газэта «Белорусы и рынок».
Форум