Як паведамілі ў Савеце міністраў, пастанова адкарэктуе сыстэму рэгуляваньня цэнаў у Беларусі, зьмены закрануць як вытворцаў, так і суб’ектаў гандлю. Ключавой мэтай зьменаў названае «падвышэньне фінансавай устойлівасьці айчынных вытворцаў, ухіленьне адміністрацыйных бар’ераў узгадненьня цэнаў».
Падрабязнасьці зьменаў у пастанову № 713 «Аб сыстэме рэгуляваньня цэнаў», якія ўносяць ужо шосты раз, ва ўрадзе пакуль не прывялі.
21 сакавіка 2025 году Міністэрства антыманапольнага рэгуляваньня і гандлю анансавала, што ў Беларусі будзе значна скарочаны пералік тавараў, цэны на якія рэгулюе дзяржава. Цяпер пастановай ураду рэгулююцца цэны на 331 пазыцыю тавараў.
Падчас нарады 28 сакавіка Аляксандар Лукашэнка, выказваючыся аб прапановах ураду наконт сыстэмы рэгуляваньня цэнаў, паставіў пад сумнеў ідэю новага прэм’ер-міністра Аляксандра Турчына абмежаваць пералік тавараў, цэны на якія рэгулююцца.
Цэнавае рэгуляваньне ўрад увёў у 2022 годзе, каб стрымаць інфляцыю.
Дзяржаўнае рэгуляваньне цэн прывяло да праблемаў у сыстэме гандлю. Як паведамляе Белстат, у студзені 2025 году рэнтабэльнасьць сыстэмы раздробнага гандлю склала 1,4%. У 2024 годзе ў краіне было 97 стратных арганізацыяў раздробнага гандлю (у 2023 годзе такіх было 88), гэта 14,4% ад іх агульнай колькасьці. Стратаў на адну такую арганізацыю прыпадала 2,8 мільёна рублёў.
Такім чынам праз замарожваньне цэнаў урадам гандаль у істоце ператварыўся ў беспрыбытковую дзейнасьць. Скарачэньне пераліку тавараў, цэны на якія рэгулююцца, як чакаецца, паскорыць інфляцыю.
Паводле Белстату, у лютым 2025 году спажывецкія цэны ў Беларусі вырасьлі на 1,3%, а за 2024 год інфляцыя склала 5,2%.
Да рэгуляваньня цэнаў рэнтабэльнасьць продажаў у беларускім раздробным гандлі складала 3-5%.
Форум