Кітай увёў дадатковыя 10-15% мытныя тарыфы на амэрыканскія тавары. Акрамя таго, Пэкін аб’явіў аб пашырэньні сьпісу экспартнага кантролю, уключыўшы ў яго 15 амэрыканскіх кампаній. Яны, паводле зьвестак улад КНР, нясуць пагрозу нацыянальнай бясьпецы і інтарэсам Кітая. Унясеньне ў сьпіс азначае, што ім забаронены экспарт тавараў двайнога прызначэньня.
Канада абʼявіла аб увядзеньні люстраных 25% мытных тарыфаў і заклікала ЗША перагледзець свае тарыфы. Атава з прычыны дзеяньняў Вашынгтона таксама падала пазоў у СГА.
Прэзыдэнтка Мэксыкі Кляўдыя Шэйнбаўм заявіла, што ва ўраду ёсьць плян крокаў у адказ, але дэталяў не раскрыла.
Па дадзеных Bloomberg, з прычыны новых амэрыканскіх мытаў ВУП Кітая можа зьнізіцца прыкладна на 0,5%, а экспарт — на 2,5%. У выйгрышы пры гэтым могуць апынуцца краіны Паўднёва-Ўсходняй Азіі дзякуючы дывэрсыфікацыі ланцужкоў паставак. Напрыклад, Тайлянд пасьля прынятых Кітаем захадаў паабяцаў павялічыць імпарт сельгаспрадукцыі са ЗША.
Вашынгтон таксама мае намер увесьці мыты і на тавары з Эўразьвязу. Як піша The Telegraph, размова ідзе аб 10-працэнтных зборах на ўсю прадукцыю. Па словах Трампа, дэфіцыт ЗША ў двухбаковым таваразвароце з ЭЗ перавышае 300 мільярдаў даляраў.
Форум