ЗША могуць адключыць Украіну ад доступу да спадарожнікавага інтэрнэту Starlink у выпадку няўдачы перамоваў па пагадненьні аб доступе ЗША да карысных выкапняў Украіны, паведамляе агенцтва Reuters са спасылкай на тры крыніцы, блізкія да перамоўнага працэсу.
З публікацыі незразумела, ці ідзе гаворка пра поўнае адключэньне доступу да спадарожнікавага інтэрнэту Starlink з тэрыторыі Ўкраіны або пра спыненьне Вашынгтонам аплаты кантрактаў з сэрвісам (яны аплачваюцца зь бюджэту Пэнтагону). Улетку агенцтва Bloomberg ацэньвала кантракт прыблізна ў 2,3 мільёна даляраў за месяц.
Паводле зьвестак Reuters, амэрыканскі бок пагражае адключэньнем Starlink, калі Кіеў не зацьвердзіць пагадненьне з Вашынгтонам аб наданьні ЗША доступу да мінэральных рэсурсаў Украіны. Прэзыдэнт Уладзімір Зяленскі адмовіўся падпісваць першы варыянт пагадненьня, прапанаваны міністрам фінансаў ЗША Скотам Бесэнтам.
Амбасада Ўкраіны ў Вашынгтоне, Белы дом і Мінабароны ЗША, а таксама кампанія SpaceX, якой належыць Starlink, не адказалі на запыты Reuters.
Выданьне Axios сьцьвярджае са спасылкай на неназваныя крыніцы, што амэрыканскія і ўкраінскія прадстаўнікі вядуць інтэнсіўныя перамовы, каб завяршыць падрыхтоўку пагадненьня аб выкапнях і спыніць пагаршэньне адносінаў паміж дзьвюма краінамі. Паводле інфармацыі The Wall Street Journal, угоду могуць падпісаць ужо сёньня, 22 лютага. Яе ўмовы афіцыйна не раскрываліся.
Форум