«У наступныя 10 дзён мы прымем рашэньне, ці пойдзем на выбары, ці сфармуем новы ўрад. Мы як Сэрбская прагрэсіўная партыя (SNS) пакуль ня маем кандыдата [на прэм’ер-міністра]», — сказаў прэзыдэнт Аляксандар Вучыч 28 студзеня.
Прэзыдэнт выступіў на прэс-канфэрэнцыі пасьля таго, як адстаўка прэм’ер-міністра Мілаша Вучавіча справакавала новую крызісную сытуацыю ў сэрбскім урадзе.
Сэрбія зьяўляецца парлямэцкай рэспублікай, дзе выканаўчая ўлада належыць прэм'ер-міністру.
Вучавіч стаў найвышэйшым службоўцам, які пайшоў у адстаўку на фоне масавых пратэстаў у сталіцы Сэрбіі Бялградзе і іншых гарадах пасьля абвальваньня бэтоннага даху на чыгуначнай станцыі ў горадзе Нові Сад 1 лістапада, што прывяло да гібелі 15 чалавек.
Студэнты Бялградзкага ўнівэрсытэту 27 студзеня ўдзельнічалі ў 24-гадзіннай блякадзе буйной транспартнай разьвязкі падчас пратэсту ў сталіцы Сэрбіі.
Студэнцкія пратэсты, якія працягваюцца тры месяцы, патрабуюць прыцягненьня вінаватых да адказнасьці, пры гэтым многія заяўляюць, што трагедыя адбылася праз карупцыю і некампэтэнтнасьць.
Выступаючы на тэрмінова скліканай прэс-канфэрэнцыі ў Бялградзе 28 студзеня, Вучавіч заявіў, што ён і мэр Новага Саду Мілан Джурыч пакідаюць свае пасады, каб прадэманстраваць адказнасьць за тое, што адбылося.
«З адстаўкай прэм’ер-міністра сыходзіць увесь кабінэт, таму фактычна ўвесь урад ідзе ў адстаўку», — сказаў ён, дадаўшы, што Вучыч прыняў яго рашэньне.
Вучыч адзначыў, што прыняў адстаўку Вучавіча неахвотна, бо прэм’ер-міністар добра выконваў сваю працу і «не зрабіў нічога дрэннага».
Вучыч застаецца ўплывовай фігурай у краіне з насельніцтвам каля 6,8 мільёна чалавек, імкнучыся падтрымліваць традыцыйна цесныя сувязі з Расеяй, адначасова прасоўваючы Сэрбію як кандыдатку на ўступленьне ў Эўрапейскі зьвяз.
SNS дамінуе ў палітыцы Сэрбіі больш за дзесяць гадоў, усталяваўшы кантроль амаль на ўсіх узроўнях улады.
Згодна з Канстытуцыяй Сэрбіі, калі парлямэнт ня зможа выбраць новы ўрад на працягу 30 дзён пасьля адстаўкі прэм’ер-міністра, прэзыдэнт абавязаны распусьціць Нацыянальную асамблею і прызначыць выбары.
Вучыч заявіў, што правядзе кансультацыі з усімі парлямэнцкімі партыямі наконт далейшых дзеяньняў.
Форум