У праграме падкрэсьліваецца, што Камуністычная партыя, вылучаючы Сыранкова, «ідзе на выбары не замест, а разам з прэзыдэнтам Аляксандрам Рыгоравічам Лукашэнкам», а сам кандыдат абяцае захаваць «пераемнасьць палітычнага і сацыяльна-эканамічнага курсу», які праводзіць Лукашэнка.
У сваёй праграме Сыранкоў абяцае «не дапускаць празьмернага расслаеньня грамадзтва» і прытрымлівацца прынцыпу «бедны плаціць менш, а багаты — больш». Сярод іншага, ён настойвае на паступовым павелічэньні падатку на прыбытак і прапануе ўвесьці падаткі на багацьце і раскошу, а таксама заканадаўча замацаваць «абавязаньні прыватных суб’ектаў гаспадараньня да выкананьня дабрачыннай дзейнасьці».
Сыранкоў абяцае перавесьці найманых работнікаў на бестэрміновыя працоўныя дамовы, зьнізіць пэнсійны ўзрост да 55 гадоў для жанчын і 60 гадоў для мужчын, вярнуць ільготы чарнобыльцам і «афганцам».
Таксама кандыдат абяцае «зрабіць больш жорсткім кантроль над цэнамі і стварыць адзіную дзяржаўную сацыяльна арыентаваную сетку рытэйлу зь мінімальнымі нацэнкамі». У пытаньні цэнаўтварэньня ён лічыць неабходным «крымінальна забараніць практыку сыстэмы пасярэднікаў-перакупшчыкаў».
У сваёй праграме Сыранкоў прапануе нацыяналізаваць банкі і замацаваць у Канстытуцыі «забарону на прыватызацыю любых формаў дзяржаўнай уласнасьці».
Гаворачы пра мэдыцыну, ён канстатуе адток мэдычных кадраў зь дзяржаўных у прыватныя мэдычныя ўстановы і прапануе «паступовае адзяржаўленьне прыватных, камэрцыйных мэдустановаў і адмову ад аказаньня платных паслуг». Таксама ён выступае супраць «камэрцыялізацыі прыватнай адукацыі» і абяцае ўзмацніць «вайскова-патрыятычнае выхаваньне».
Сыранкоў лічыць, што, нягледзячы на «намаганьні дзяржавы па барацьбе з наступствамі 2020 году», у Беларусі «застаецца дастатковая колькасьць асобаў, якія ўдзельнічалі ў спробе дзяржаўнага перавароту». «Прапануем паглыбіць ачышчэньне сыстэмы ня толькі дзяржавы, але і ўсяго грамадзтва ад пярэваратняў, якія займаюць адказныя пасады і гайдалі сыстэму ў 2020 годзе, а цяпер прытаіліся і чакаюць паслабленьняў для аднаўленьня сваёй тлятворнай актыўнасьці. Галоўны ўрок 2020 году: „Лібэралізацыя — гэта шлях да майдану“», — падкрэсьліваецца ў праграме.
Таксама Сыранкоў прапануе ўвесьці дзяржаўную цэнзуру друку, літаратуры, кінэматографу, культуры і твораў культуры і мастацтва на «адпаведнасьць ідэалёгіі беларускага сацыялізму і ў мэтах недапушчэньня маральнага, каштоўнаснага, ідэалягічнага і духоўнага разлажэньня грамадзтва і краіны».
Сыранкоў лічыць патрэбным забараніць казіно, азартныя гульні, а таксама «пачаць дзяржаўную барацьбу з праявамі распусты і садаміі, увесьці крымінальную адказнасьць за прапаганду і практыку ЛГБТ», перагледзець заканадаўства аб разводах і абмежаваць аборты.
Прадстаўнік КПБ настойвае на аднаўленьні гераічнай памяці Іосіфа Сталіна і прапануе аднавіць помнікі яму ў Беларусі, выступае за «недапушчэньне абяленьня царызму, шляхецтва, дваранства, магнацтва, алігархіі» і прапануе «ўвесьці мараторый на перайменаваньне вуліц, зьвязаных з нашым савецкім мінулым».
У зьнешняй палітыцы ён хоча «паглыбіць супрацоўніцтва з саюзьнікамі па АДКБ і ШАС», арыентавацца на сяброўства з Кітаем.
У пытаньні мовы Сыранкоў выступае за «дзяржаўную падтрымку беларускай мовы і культуры, якія зьяўляюцца ўнікальным і непаўторным скарбам нашай краіны».
- Выбары ў Беларусі адбываюцца ва ўмовах палітычнага крызісу, шырокамаштабных рэпрэсій і, паводле міжнародных арганізацый, носяць несвабодны і недэмакратычны характар. У Беларусі не засталося афіцыйна зарэгістраваных апазыцыйных партый і незалежных грамадзкіх арганізацый.
- Ніводзін з кандыдатаў у час збору подпісаў і ў час выступаў на тэлевізіі і радыё не крытыкаваў Аляксандра Лукашэнку і не прапаноўваў абраць прэзыдэнтам новага чалавека.
- З 2001 году міжнародная супольнасьць і незалежныя назіральнікі не прызнаюць вынікі выбараў у Беларусі.
Выбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Паводле заканадаўства, сёмыя прэзыдэнцкія выбары ў Беларусі павінны былі адбыцца не пазьней за 20 ліпеня 2025 году.
- Аляксандар Лукашэнка адразу ж заявіў пра намер працягнуць сваю ўладу над краінай яшчэ прынамсі на 5 гадоў. Гэтыя выбары сталі сёмымі для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада пасьля гэтага выпусьцілі сумесную заяву, у якой падкрэсьлілі, што электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Гэтыя выбары ў Беларусі пры Лукашэнку насілі, паводле міжнародных арганізацый, несвабодны і недэмакратычны характар. Выбарчая кампанія праходзіла ва ўмовах шырокамаштабных рэпрэсій і палітычнага крызісу, які цягнецца ад папярэдніх прэзыдэнцкіх выбараў 2020 году. 97% членаў выбаркамаў працавала на папярэдніх выбарах, вынікае з дакладу ініцыятывы былых сілавікоў BelPol.
- Паводле ЦВК, яўка на выбарах склала 86,82%. Ужо ў ноч на 27 студзеня Цэнтральная выбарчая камісія заявіла, што за Лукашэнку прагаласавалі 86,82% выбарнікаў. 3 лютага ў ЦВК заявілі, што згодна з канчатковымі вынікамі Аляксандар Лукашэнка атрымаў 5 136 293 галасы (86,82%), Сяргей Сыранкоў — 189 740 галасоў, Алег Гайдукевіч — 119 272 галасы, Ганна Канапацкая — 109 760 галасоў, Аляксандар Хіжняк — 102 789 галасоў.
- У Эўрапарлямэнце 22 студзеня ўхвалілі рэзалюцыю, у якой заклікалі не прызнаваць прэзыдэнцкія выбары 26 студзеня і легітымнасьць Лукашэнкі. Праваабаронцы Libereco і «Вясны» назвалі выбары ў Беларусі «прапагандысцкім шоў», Міжнародны інстытут дэмакратыі і садзейнічаньня выбарам — «„самапрызначэньнем“ Лукашэнкі», а гендакладчык ПАРЭ па дэмакратычнай Беларусі Рышард Пэтру заявіў, што яны «стануць чарговай фікцыяй». У Amnesty International адзначылі ўзмацненьне палітычных рэпрэсій перад выбарамі.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не прызнала міжнародная супольнасьць, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі. Палітычны крызіс, які ўзьнік пасьля выбараў 2020 году ў Беларусі, і шырокамаштабныя рэпрэсіі ў краіне працягваюцца дагэтуль. У сувязі з пагрозай палітычнага перасьледу Беларусь пасьля 2020 году, паводле розных ацэнак, пакінулі сотні тысяч беларусаў. У Беларусі ліквідавалі амаль амаль усе палітычныя партыі, грамадзкі сэктар краіны, пачынаючы з пасьлявыбарчага пэрыяду 2020 году, страціў больш за 1,8 тысячы некамэрцыйных арганізацыяў. Пасьля выбараў 2020 году ў Беларусі прызналі «экстрэмісцкімі фармаваньнямі/арганізацыямі» і заблякавалі практычна ўсе незалежныя СМІ, журналісты гэтых мэдыя сутыкнуліся з затрыманьнямі, адміністрацыйным і крымінальным перасьледам, многія вымушана пакінулі краіну і працягнулі працаваць з-за мяжы.
Форум