Лінкі ўнівэрсальнага доступу

Фінскі канал адмовіўся паказваць сустрэчу жаночай зборнай Фінляндыі зь беларускамі


Сьцяг Фінляндыі
Сьцяг Фінляндыі

Матч жаночай зборнай Беларусі ў футболе супраць Фінляндыі 4 красавіка ня будзе паказвацца на каналах Yleisradion.

Мэнэджэр Yle Sports Ёзэ Паланен пракамэнтаваў скасаваньне паказу футбольнай сустрэчы. Ён сказаў, што рашэньне дырэкцыя каналу прыняла неўзабаве пасьля таго, як вызначылася група жаночай зборнай у Лізе нацый, піша Трыбуна з спасылкай на фінскую старонку is.fi.

«Фінляндыі не пашанцавала зь лятарэяй. Беларусь адхіленая ад удзелу ў большасьці міжнародных відаў спорту, але УЭФА прыняў рашэньне дазволіць ёй удзельнічаць. Нам трэба было вырашыць, паказваць ці не. Мы лічым, што зараз непрыдатны час для Беларусі прадстаўляць сваю краіну ў якасьці нацыянальнай зборнай у гэтай ваеннай сытуацыі», — заявіў Паланен.

Прадстаўнік каналу таксама адзначыў, што ні Фінская футбольная асацыяцыя, ні сама зборная не хацелі бы праводзіць сустрэчы супраць Беларусі, але байкот прывёў бы да страты пунктаў і іншых штрафаў.

«Фэдэрацыя цалкам зразумела наша рашэньне. У некаторых выпадках гэта складаней, але тут была магчымасьць прыняць рашэньне самастойна», — сказаў Паланен.

Раней Фінская футбольная асацыяцыя перанесла хатні матч за межы Фінляндыі празь нежаданьне прымаць зборную Беларусі на сваёй тэрыторыі. Паядынак адбудзецца 4 красавіка ў італьянскім Міляне.

Гэта ўжо ня першы выпадак, калі замежныя футбольныя каманды адмаўляюцца гуляць зь беларусамі. Раней зборная Эстоніі адмовілася гуляць супраць Беларусі ў ¼ фіналу Эўралігі пляжнага футболу нават цаною расстаньня з турнірам.

Першай камандай, якая адмовілася выходзіць на поле супраць беларускіх атлетаў, стала жаночая зборная Літвы. У адборавым турніры да чэмпіянату сьвету літоўкі нават коштам дзьвюх тэхнічных паразаў вырашылі не гуляць супраць беларусак.

24 лютага 2022 году Расея пачала поўнамаштабную фазу вайны супраць Украіны, напад адбыўся і з тэрыторыі Беларусі. Аляксандар Лукашэнка, які незаконна ўтрымлівае ўладу ў Беларусі, шмат разоў публічна падтрымліваў дзеяньні расейцаў і адзначаўся антыўкраінскімі заявамі. УЭФА ж раней праігнаравала падрабязны даклад, які сьведчыў пра рэгулярнае ўмяшаньне ўладаў у дзейнасьць футбольных арганізацый краіны.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава
XS
SM
MD
LG