Міністар унутраных спраў Эстоніі Лаўры Ляанэмэтс заявіў аб намеры прапанаваць парламэнту прызнаць Расейскую праваслаўную царкву тэрарыстычнай арганізацыяй. Аб гэтым ён сказаў у эфіры тэлеканала ETV. Яго словы прыводзіць сайт ERR.
«Калі правесьці паралель, ісламскія тэрарысты, якія гавораць, што вядуць сьвятую вайну супраць заходняга сьвету, каштоўнасьцяў заходняга сьвету, то сёньня патрыярх і патрыярхат, якія дзейнічаюць у Маскве, нічым не адрозьніваюцца ад ісламскіх тэрарыстаў», — сказаў ён.
Паводле яго, Маскоўскі патрыярхат падпарадкоўваецца Ўладзіміру Пуціну, які, як заявіў ён, па сутнасьці, «кіруе тэрарыстычнай дзейнасьцю ў сьвеце».
Лаўры Ляанэмэтс адзначыў, што прызнаньне РПЦ тэрарыстычнай арганізацыяй не паўплывае на прыхаджан і не азначае, што храмы будуць закрытыя, але пры гэтым «сувязі з Масквой будуць разарваныя».
Падпарадкаваньне Маскве, як лічыць кіраўнік МУС, нясе пагрозу бясьпецы Эстоніі.
Прадстаўнік Эстонскай праваслаўнай царквы Маскоўскага патрыярхату раней заявіў, што яны не знаходзяцца ў прамым падпарадкаваньні РПЦ і ня могуць несьці адказнасьць за выказваньні ў падтрымку вайны Расеі супраць Украіны, якія гучаць у Маскве.
Кіраўнік сынадальнага аддзелу Маскоўскага патрыярхату па ўзаемаадносінах Царквы з грамадзтвам і СМІ Ўладзімір Легойда заявіў, што прапанова прызнаць РПЦ тэрарыстычнай арганізацыяй вяртае Эстонію «ў цёмныя часы рэлігійных войнаў, Варфаламееўскай ночы і паляваньня на ведзьмаў».
Праваслаўная царква Эстоніі мае больш за 100 тысяч пасьлядоўнікаў. У студзені 2024-га эстонскія ўлады адмовіліся працягваць дазвол на жыхарства кіраўніку мясцовай мітраполіі РПЦ Валерыю Рашэтнікаву. Яго прызналі пагрозай бясьпецы дзяржавы.
Да гэтага Эстонія забараніла ўезд у краіну патрыярху Маскоўскаму і ўсяе Русі Кірылу.
