Асобы, якія жадаюць атрымаць грамадзянства Нямеччыны, у будучыні павінны быць гатовыя да пытаньняў пра Ізраіль, пра антысэмітызм, пра Галакост і традыцыі габрэйскага жыцьця ў Нямеччыне. Пра гэта піша DW.
Як паведаміў часопіс Spiegel, гэтыя пытаньні ўключаць у тэст, які мусяць здаваць усе, хто хоча стаць нямецкім грамадзянінам.
Калі на тэрыторыі сучаснай Нямеччыны зьявілася першая габрэйская грамада? Як называецца асноўны рэлігійны інстытут юдэяў? У якім годзе была заснаваная дзяржава Ізраіль? Чаму Нямеччына нясе асаблівую адказнасьць за лёс Ізраілю? Які штраф пагражае ў Нямеччыне тым, хто адмаўляе Галакост?
Гэта прыклады пытаньняў, якія будуць уключаныя ў тэст на грамадзянства Нямеччыны. Зьвесткі, апублікаваныя Spiegel, пацьвердзілі ў Міністэрстве ўнутраных справаў Нямеччыны.
«Той, хто не падзяляе нашы каштоўнасьці, ня зможа атрымаць нямецкі пашпарт», — лічыць кіраўніца МУС Нэнсі Фэзэр. Паводле яе слоў, асаблівая адказнасьць Нямеччыны ў тым, што тычыцца абароны габрэяў і Ізраілю, абумоўленая злачынствамі, учыненымі немцамі ў часы нацыянал-сацыялізму.
«Тыя, хто хоча стаць грамадзянамі Нямеччыны, павінны ўсьведамляць ступень адказнасьці. Гэтае ўсьведамленьне павінна быць яснае і годнае даверу», — падкрэсьлівае Фэзэр.
