Арцыбіскуп Тадэвуш Кандрусевіч знаходзіцца ў шпіталі, паведаміў арцыбіскуп Юзаф Станеўскі падчас вячэрняй імшы ў менскай архікатэдры, піша «Хрысьціянская візія». Прычыны шпіталізацыі не паведамляюць.
Арцыбіскуп Станеўскі прасіў усіх вернікаў маліцца за арцыбіскупа Кандрусевіча.
Апошні раз Кандрусевіч трапляў у шпіталь летась. Трэцяга сакавіка яго выпісалі. Вярнуўшыся дадому, герарх праз партал Catholic.by падзякаваў «Богу, лекарам і ўсім, хто за яго моліцца».
«Калі з вуснаў лекараў-анколягаў пачуў дыягназ „мэлянома“, то, усьведамляючы сур’ёзнасьць хваробы, паўтарыў словы Сьвятога Пісаньня: „Калі прымаем ад Бога дабро, то чаму ня можем прыняць зло?“, бо, можа, прыйшоў час, калі станаўлюся непатрэбным слугой. Даверыў сябе Богу і маліўся аб здароўі, але пры гэтым згаджаўся з Божай воляй». — напісаў у сваім звароце Кандрусевіч.
Мэлянома — гэта небясьпечнае анкалягічнае захворваньне, якое праяўляецца ростам злаякаснай пухліны ў вобласьці скуры або сьлізістых абалонак.
Апэрацыю па выдаленьні пухліны правялі 8 лютага 2023 году. Тадэвуш Кандрусевіч падзякаваў лекарам за іх прафэсіяналізм і ахвярнае служэньне хворым.
- Тадэвуш Кандрусевіч узначальваў Канфэрэнцыю каталіцкіх біскупаў у Беларусі з 2015 году. У 2020-м кіраўнік беларускай Каталіцкай царквы мітрапаліт Тадэвуш Кандрусевіч выступіў з крытыкай гвалту, які чынілі ўлады пасьля сфальшаваных выбараў прэзыдэнта. Яму амаль 4 месяцы не дазвалялі вярнуцца на радзіму з-за мяжы.
- Арцыбіскупа пусьцілі толькі ў сьнежні 2020 году. У студзені 2021-га Тадэвуш Кандрусевіч выйшаў на пэнсію.
