Пра завяршэньне збору, які складаў каля 1,8 мільёна даляраў, паведаміла маці Лізы Церабавец ў Instagram.
«Нарэшце мы можам сказаць доўгачаканыя словы — збор закрыты! Сабраныя сродкі будуць акумуляваныя і пераведзеныя на рахунак РНПЦ „Маці і дзіця“. Астатнюю частку неабходнай сумы дадае дзяржава ў асобе Міністэрства аховы здароўя за кошт пазабюджэтных спонсарскіх сродкаў», — расказала мама Лізы.
Яна таксама павеадміла ў сацсетках, на 4 лютага 2024 года было сабрана крыху больш за мільён (1 092 773,74 даляра) — гэта 60,06% ад цаны прэпарату.
- Сьпінальная мускульная атрафія (СМА) — шэраг захворваньняў, пры якіх слабеюць і адміраюць цягліцы ног, шыі, галавы. Такім дзецям складана смактаць, глытаць, трымаць галаву, поўзаць. СМА можа праявіцца як у раньнім дзяцінстве, так і ў дарослым узросьце. Хвароба гэтая перадаецца ў спадчыну, бо зьвязаная з парушэньнямі ў генах.
- Калі яе не лячыць, то перастаюць працаваць лёгкія і чалавек памірае. Пры самай складанай форме СМА 1 тыпу дзеці без мэдычнай дапамогі ў асноўным паміраюць ва ўзросьце да двух гадоў, а бывае, у першыя дні пасьля нараджэньня.
- У Беларусі ў 2023 годзе жыло каля 92 дзяцей з СМА, а таксама 54 дарослыя. Кожны год у Беларусі нараджаецца каля 10 дзяцей з СМА.
- Летась беларусы дазьбіралі амаль 2 мільёны даляраў для лячэньня маленькай Рыты Юшкевіч зь Ліды. Гэтая гісторыя атрымала вялікі розгалас.
