Справу сужэнцаў разглядаў Менскі абласны суд. Паводле матэрыялаў справы, 14 студзеня 2023 году Анастасія і Аляксандар Таратуты да сьмерці пабілі свайго трохгадовага сына Сямёна. Непасрэдна перад сьмерцю хлопчыку нанесьлі 9 удараў, 7 зь іх па галаве. У выніку дзіцяці была прычыненая закрытая чэрапна-мазгавая траўма, якая стала прычынай кровазьліцця пад мазгавыя абалонкі, ускладненая ацёкам галаўнога і сьпіннога мозгу, паведамляла Sb.by.
18 кастрыніка дзяржаўная абвінаваўца запрасіла для Аляксандра Таратуты сьмяротнае пакараньне.
Жонцы Аляксандра, абвінавачанай Анастасіі Таратуце, пракурорка запрасіла прызначыць 25 гадоў пазбаўленьня волі ў папраўчай калёніі строгага рэжыму (гэта ў Беларусі максымальнае пакараньне для жанчыны).
Дзяржабвінаваўца адзначыла, што абое абвінавачаных нясуць выключную небясьпеку для грамадзтва, а абставіны крымінальнай справы аб забойстве і катаваньні маленькага Сямёна выклікаюць шок.
19 кастрычніка судзьдзя пагадзілася з пракурорам і прызнала сужэнцаў вінаватымі.
У выніку Анастасіі прысудзілі адпаведна 25 гадоў калёніі ва ўмовах строгага рэжыму, а Аляксандру — сьмяротнае пакараньне шляхам расстрэлу.
Як расказала праваабаронцам «Вясны» былая сукамэрніца Анастасіі Таратуты, пасьля затрыманьня ў слуцкім аддзеле Сьледчага камітэту тую білі аголеным электрапровадам з патрабаваньнем даць прызнальныя паказаньні.
Паводле сукамэрніцы Анастасіі, пасьля таго, як Аляксандар пачаў біць дзіця, яна зьвярталася ў міліцыю, але яго толькі аштрафавалі.
У 2023 годзе яна раілася з супрацоўнікамі сацыяльнай службы наконт разводу, але тыя раілі «захаваць сям’ю».
Сьмяротнае пакараньне ў Беларусі
- Беларусь застаецца апошняй краінай Эўропы, дзе караюць сьмерцю.
- Усяго за гады незалежнасьці ў Беларусі вынесьлі больш за 300 сьмяротных прысудаў.
- Улады Беларусі не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.
- Эўразьвяз пэрыядычна заклікае Беларусь адмовіцца ад сьмяротнага пакараньня.
- Нягледзячы на ўсе просьбы міжнароднай супольнасьці, рэжым Лукашэнкі працягвае выносіць сьмяротныя прысуды. 19 кастрычніка 2023 вынесены чарговы зь іх — Аляксандру Таратуту са Слуцку, які забіў 3-гадовае дзіця.
