Сярод паліцыянтаў, якія загінулі падчас нападу ХАМАС на Ізраіль 7 кастрычніка, было двое ўраджэнцаў Беларусі. Пра гэта паведамляюць расейскія СМІ.
25-гадовую Алену Астапенку, ураджэнку Беларусі, пахавалі ўчора ўначы, расказала тэлеграм-каналу «Осторожно, новости» маці дзяўчыны.
Паводле зьвестак каналу, Алена Астапенка эмігравала ў Ізраіль з мамай і старэйшай сястрой у 2000 годзе з Рэчыцы (Гомельская вобласьць). Алене тады было два гады. «Яна была вельмі добрай дзяўчынкай, як я яе памятаю, калі была маленькая», — расказаў «Осторожно, новости» сябар сям’і.
У Ізраілі Алена скончыла школу, пасьля адслужыла тэрміновую службу ў войску, у апошні час жыла на поўдні краіны, у Нэтывоце, і служыла ў паліцыі. Сябры сямʼі адзначаюць, што сама Алена пра сваю службу не расказвала: некаторыя зь іх толькі з навінаў даведаліся, што яна была паліцыянткаю.
Раніцай 7 кастрычніка падчас нападу баевікоў ХАМАС на паўднёвыя паселішчы Ізраілю Алена патрулявала ўчастак у горадзе Афакім. Разам зь іншымі паліцыянтамі і байцамі Арміі абароны Ізраілю адбівала напады баевікоў. Мясцовыя СМІ паведамлялі, што на 21-м участку на поўдні Ізраілю ў гарадах Афакім і Нэтывот ішоў стралковы бой з ХАМАС.
Таксама падчас нападу баевікоў ХАМАС на прымежныя тэрыторыі Ізраілю загінуў 38-гадовы ўраджэнец Беларусі Віталь Карасік, паведаміла ўдава загінулага Юлія Карасік.
Віталь Карасік нарадзіўся ў беларускім Магілёве ў 1985 годзе. Шмат гадоў таму пара пераехала ў Ізраіль. Віталь працаваў сьледчым аддзелу крыміналістыкі Тэль-Авіўскай акругі ў званьні сяржанта. «Мой муж загінуў, абараняючы краіну ад тэрарыстаў», — сказала Юлія.
Раней стала вядома пра тры выпадкі раненьня грамадзян Беларусі: маці і сын былі параненыя ў Ашкелоне, яшчэ адна беларуска пацярпела, калі спускалася ў бамбасховішча.
Агульная колькасьць ахвяраў з двух бакоў ужо перавысіла 2 тысячы: у Ізраілі загінулі больш за 1200 чалавек, у тым ліку 155 вайскоўцаў, а ў Газе — 900 чалавек, у тым ліку 260 дзяцей і 230 жанчын, паведамляе Associated Press. Тысячы параненых з абодвух бакоў.
У Ізраілі паведамілі, што баевікі ХАМАС выкралі больш за 150 ізраільцаў. Узброеная групоўка ХАМАС папярэдзіла, што будзе забіваць аднаго з закладнікаў кожны раз, калі ізраільскія вайскоўцы без папярэджаньня будуць бамбіць цывільныя аб’екты ў Газе.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
