Вышэйшы выбарчы суд Бразыліі большасьцю галасоў забараніў былому прэзыдэнту краіны Жаіру Балсанару займаць дзяржаўныя пасады да 2030 году за ягоныя паводзіны падчас выбараў 2022 году, паведамляе Reuters.
Пяць з сямі судзьдзяў прагаласавалі за тое, каб прызнаць 68-гадовага Балсанару вінаватым у злоўжываньні ўладай і ілжывых заявах аб тым, што электронныя бюлетэні, якія выкарыстоўваюцца ў краіне, уразьлівыя для нападаў хакераў і могуць быць падтасаваныя.
Галоўны судзьдзя ў гэтай справе Бэнэдыта Гансалвеш заявіў, што былы прэзыдэнт «паставіў пад пагрозу давер» да выбарчай сыстэмы Бразыліі.
Пастанова пазбаўляе Балсанару права балятавацца на наступных прэзыдэнцкіх выбарах у 2026 годзе. Бразыльскім правым зараз неабходна шукаць новага кандыдата, адзначае RFI.
Балсанару адмаўляе парушэньні, а яго адвакаты паабяцалі падаць у Вярхоўны суд апэляцыю, якая, паводле назіральнікаў, наўрад ці будзе пасьпяховай.
Па словах Балсанару, калі забарона балятавацца застанецца ў сіле, ён падтрымае сваю жонку Мішэль у якасьці кандыдата ў прэзыдэнты.
- Балсанару летась зь невялікім адрывам прайграў выбары леваму кандыдату, былому прэзыдэнту Луісу Лулу да Сілву. Прыхільнікі Балсанару, якія не прызналі вынікі выбараў, учынілі ў сталіцы беспарадкі.
