«У Бярэзінскім запаведніку і ў яго навакольлі жыве найбольшая папуляцыя гэтага віду, якая за 20 гадоў павялічылася ў два разы і цяпер складае прыблізна 90 асобін», — паведамілі на сайце Бярэзінскага біясфэрнага запаведніка.
Навукоўцы Аляксандар Рак і Васіль Грычык мяркуюць, што асноўнымі магчымымі прычынамі павелічэньня папуляцыі бурага мядзьведзя ў запаведніку і ў цэлым на паўночным усходзе Беларусі зьяўляюцца эфэктыўная ахова паляўнічых угодзьдзяў ад браканьерства і забарона паляваньня на дзікага кабана.
Сярод іншых прычын, якія паўплывалі на папуляцыю бурага мядзьведзя, навукоўцы назвалі зьніжэньне колькасьці сельскага насельніцтва і павелічэньне пасяўных плошчаў кукурузы.
14 сакавіка Міністэрства прыродных рэсурсаў і аховы навакольля Беларусі сваёй пастановай № 10 зацьвердзіла пералікі жывёл і расьлін, якія маюць статус рэдкіх або знаходзяцца пад пагрозай зьнікненьня.
У новым выданьні Чырвонай кнігі да найменш ахоўванай чацьвёртай ступені панізілі статус зубра (раней быў у трэцяй катэгорыі), бурага мядзьведзя (быў у першай, найвышэйшай для аховы), барсука і рысі (абодва віды былі ў другой катэгорыі).
Першая катэгорыя нацыянальнай прыродаахоўнай значнасьці надаецца для дзікіх жывёл і дзікарослых расьлін з найвышэйшай рызыкай зьнікненьня, чацьвёртая — для тых, колькасьць якіх «схільная да ваганьняў», але не патрабуе асаблівых захадаў для захаваньня.
У лістападзе 2024 году Аляксандар Лукашэнка падпісаў указ, паводле якога дазваляецца паляваньне на мядзьведзя і рысь у «асаблівым рэжыме», што дазваляе «кантралявана рэгуляваць іх колькасьць на падставе плянаў кіраваньня папуляцыямі, якія распрацоўваюцца Нацыянальнай акадэміяй навук Беларусі».
19 кастрычніка 2022 году старшыня Беларускага таварыства паляўнічых і рыбаловаў, былы міністар унутраных спраў Ігар Шуневіч выказаў меркаваньне, што «з пункту гледжаньня прыродаахоўнай дзейнасьці Чырвоная кніга — рудымэнтарны інструмэнт».
Форум